ULakay ukhulule iSundowns emdlalweni weNedbank Cup obezikhamana kuwo

By
Pedro Mapelo
-
Terrence Dzvukamanja of Bidvest Wits scores goal while challenged by Motjeka Madisa of Mamelodi Sundowns during the 2020 Nedbank Cup Semifinals match between Mamelodi Sundowns and Bidvest Wits at the Orlando Stadium, Johannesburg on the 08 August 2020 ©Muzi Ntombela/BackpagePix

Igowuli elifakwe
nguLyle Lakay ngomzuzu wokugqibela liyikhulule isengxakini iMamelodi Sundowns ebingundaniselwe
yiBidvest Wits emdlalweni weNedbank Cup obutshisa bhe kobu busuku banamhlanje
e-Orlando Stadium. Emva komdlalo ovelise inqwaba yamagowuli amahlanu, iSundowns
iza kuya kwisigaba sokugqibela seNedbank Cup emva kokubetha iWits ngamagowuli
amathathu kwamabini (3-2) emdlalweni ekwenziwe iimpazamo ezimbi kakhulu ngabadlali
bamaqela omabini. Kuyiwe kwixesha lokuphumla iSundowns ihamba phambili
ngepenela efakwe nguRicardo Nascimento, emva kokuba uBuhle Mkhwanazi ewise
uMotjeka Madisha ngaphakathi ebhosikini. Iqela likaPitso Mosimane lisilawule
phantse sonke isigaba sokuqala lisebenzisa abadlali abafana noNicholus
Lukhubeni, uRivaldo Coetzee noLebohang Maboe ebixhokonxa ngayo phambili iDowns.
Amakhwenkwe kaGavin Hunt ngawo aphantse atsazisa igazi kuqala emva kokuba
uDenis Onyango ebhutyuze ibhola eqatyeliswe nguCole Alexander. UDeon Hotto
ngoyena mdlali obethande ukuba yinkathazo – kodwa, ngethamsanqa, ikwazile
ukuncothula ubuhlungu kuye iSundowns.

Iimpazamo
ezincinci ezenziwe ngabadlali ebaleni zibhence ukuqhana kwemilenze yabo emva
kokuhlala iinyanga ezinye bengadlali. Isiqingatha sesibini sesona sinike umdla
kakhulu ngoba besinamagowuli amaninzi. Uyakulala esothuka kobu busuku uMadisha
emva kokwenza ezona mpazamo ezifake iqela lakhe engxakini. Umtshutshisi
omkhulu, uTerrence Dzvukamanja, ubhakuzelise umnatha kabini kwisigaba sesibini
edlula kuMadisha kuzo zozibini izihlandlo. Iinguqu ezenziwe nguPitso Mosimane
kwisigaba sesibini zisebenzile ngoba zizezona zinike iqela lakhe amandla
emdlalweni. UKgaogelo Sekgota ufake igowuli lesibini leDowns emva kwempazamo
eyenziwe nguBrighton Mhlongo obevuza emdlalweni. NguLakay osindise iDowns ngokufaka
igowili lesithathu kwiWits ebibuye ngamandla kwisigaba sesibini. Noxa iSundowns
ibiyeyona inamandla emdlalweni – kodwa, ukuba. iWits ibinonozinti ongcono
ezipalini – mhlawumbi, ngekuthethwa enye into. Ngoku iMamelodi Sundowns iza
kudibana neBloemfontein Celtic evuthulule iBaroka FC ngo’3-0 emdlalweni
wokuqala emalanga namhlanje. Impumelelo yeDowns iyinika ithuba elihle
lokuphumelela indebe yesibini kule sizini kwezintathu ezilwelayo.

 

 

 

RELATED ARTICLESMORE FROM AUTHOR