Emva
kweenyanga ezine ingadlalwa ibhola ekhatywayo eMzantsi Afrika ngenxa yekhorona,
umdlalo weNedbank Cup wokuogabula izigcawu uze nemvula yamagowuli amathathu
onke. Amakhwenkwe kaJohn Maduka, ongene endaweni kaLehlohonolo Seema oye
kwiChippa United kwinyanga ephelileyo, azibekele indawo emdlalweni wokugqibela weNedbank
Cup emva kokucambalalisa iBaroka FC ngo’3-0 emdlalweni obushushu e-Orlando
Stadium ngale njikalanga yanamhlanje. Umdlalo uqale ngesantya esiphezulu,
omabini amaqela adlale ibhola eya phambili – kodwa eyona nto ethe yaphazamisa
iBaroka ibe kukukhutshwa kuka-Ananias Gebhardt ngekhadi elibomvu emva kokuba
edlale kakubi uLucky Baloyi weCeltic. Ifolosi yeSiwelele, uNdumiso Mabena,
ubhakuzelise umnatha emzuzwini wamashumi amane anethoba. Ufumene ibhola kugxa
wakhe wakhaba imbumbulu ephuncuke ezandleni zika-Elvis Chipezeze. Kuyiwe kwixesha
lokuphumla iSiwelele inkqenkqeza phambili ngegowuli elinye.
Nangona iqela
laseLimpopo liqale isigaba sesibini somdlali lijingxela, umdlalo walo
ubusemgangathweni ophezulu. Kuye kwanyanzeleka uNhlanhla Mgaga avule amehlo,
obesezipalini endaweni kaJackson Mabokgwane obengekho emdlalweni, ngoba
abadlali beBaroka bebefuna intw’ ibilapha. Umdlalo ubuzinzile futhi edlala
kakuhle omabini amaqela ngasemva. Izinto ziye zajika emva kokuba uChipezeze
ewise uMabena ebhokisini emva kokuxhimfa ngamanqindi ibhola ebimbi. UVictor Letsoalo
uyibeke emnatheni ipenela ayinikwe ngusompempe. Yatsho yahamba phambili
ngamagowuli amabini iCeltic. Emva kwemizuzu esixhenxe, uLetsoalo ubhakuzelise
umnatha kwakhona. Ngalo ndlela, iCeltic yangena ngetshamba kwisigaba
sokugqibela seNedbank Cup. Impumelelo yeCeltic iza kufunqula imimoya yabadlali
eqeleni elisoloko lisezingxakini zemali. Ngoku iCeltic iza kulinda iqela
eliphumeleleyo phakathi kweBidvest Wits neMamelodi Sundowns ezidlala umdlalo
wesibini ngentsimbi yesixhenxe ngorhatya namhlanje kwase-Orlando Stadium.
Liyoyikisa izinga lokunyamalala kwamadoda eGqeberha!