UMaso noVelaphi bawabeke endaweni entle Amavarara kwiNedbank Cup

Luvuyo
lodwa ebantwini baseChris Hani naseMpuma Koloni jikelele emva kokuba Amavarara
ebethe iSuper Eagles ngamagowuli amabini kwelinye emdlalweni weNedbank Cup
obutshisa eSisa Dukashe Stadium emalanga namhlanje. UMzunani Mgwigwi
wonelisekile ngaphandle kwamathandabuzo emva kokuba Amavarara edlulele
kumjikelo wesibini weNedbank Cup kwilinge lawo lokuqala. Amagowuli weqela
laseKomani afakwe nguSihle Maso noKhakha Velaphi kwisiqingatha sokuqala
somdlalo. Nangona Amavarara abuye nempumelelo – kodwa ibithande ukuwaxaka
iSuper Eagles kwisigaba sesibini somdlalo. Amavarara alandele iChippa United
engombe iTS Galaxy ngamagowuli amathathu yatsho yagxotha uDan Malesela
obengumqeqeshi wayo.

Kuyiwe
kwixesha lokuphumla Amavarara enkqenkqeza phambili ngamagowuli amabini eqandeni
(2-0). Umdlalo uqale ngesantya esintsi. Ilelo nelo iqela belibonakala lingafuni
ukwenza iimpazamo emdlalweni. Kubekho imingqandandana yamathuba iqela
laseKomani elingawasebenzisanga kakuhle. Kodwa izinto ziye zajika emzuzwini
wamashumi amathathu anesibini ngethuba uSihle Maso ebhakuzelisa umnatha
ngentloko emva kwebhola egotywe nguThandolweDayimane – obengomnye wabadlali
abadlale kakuhle kakhulu kwisigaba sokuqala. Emzuzwini wamashumi amane, uKhakha
Velaphi ufake igowuli lesibini laMavarara emva kokufumana ibhola ebisuka
kwisikhuthali esinguThandolwethu kwicala lasekunene.

Ekuqaleni
kwesiqingatha sesibini somdlalo, iSuper Eagles ifake Amavarara  phantsi koxinizelelo. Emzuzwini wesine
siqalile, uThabiso Mokoena ufake ibhola lula emva kokugqwidiza kwaMavarara
emva. Igowuli libakhuthazile abafana baseFree State; baquqe bebuyelela
emhlabeni weqela laseKomani. UDayimane uqulule ibhola ethe qelele – kodwa ifike
unozinti weSuper Eagles, uThemba Makate, ethe qwa ezipalini. Uphinde wasebenza
uMakate ngethuba exhimfa ibhola enzima ebikhatywe nguPule Ntsane. Khange kube
kudala, unozinti waMavarara, uKhanya Mini, uvale ibhola enzima emva
kokungakwazi kwabadlali bakhe ukuchitha ibhola emva.  Kude kwaphela umdlalo iSuper Eagles ingakwazanga ukufumana igowuli lokulinganisa. Ngalo ndlela, Amavarara adlulele phambili kwiNedbank Cup.

Amavarara: Khanya Mini, Pule Ntsane, Nkosomzi Mzazi,
Sapholwethu Kelepu, Abongile Twani, Ayavuya Gocina, Nkosomzi Mbenyana, Sihle
Maso, Thandolwethu Dayimane, Athenkosi Lafota.

Amalalela: Ayanda Masiko, Baxolise Nqumashe, Anele
Thwani, Thabo Letsika, Siphelo Sizane, Athenkosi Tonisi.

Super Eagles: Themba Makate, Fusi Letsatsi, Boitumelo
Tsotsi, Gift Mogorosi, Teboho Moloi, Maduna Vusimusi, Mojalefa Sekhoto, Pule
Khasane, Thabiso Mokoena, Motsama Moloi, Bongane Mofokeng.

Amalalela: Mbali Tshabalala, Ditsietsi Motsitsi, Sandile
Mkhwanazi, Toka Moshaliba, Buti Mokele, Vusimusi Mrajane, Katlego Banda.