Kule veki mane amaqela aza kuthatha inxaxheba kwiMaize Cup ekulindeleke idlalelwe eJames Motlatsi Stadium ukusukela ngentsimbi yeshumi kusasa ngoMgqibelo.
Amaqela amenyiweyo kulo nyaka yiKaizer Chiefs, esisigculelo sezenyeliso emva kokungaqhubi kakuhle kwiisizini ezidlulileyo kwiPSL, iChippa United eqalayo ukudlala kwiMaize Cup, iFree State Stars evale isizini egqithileyo ifumene iNedbank Cup neBuya Msuthu edlala kwi-ABC Motsepe League.
Le yitumente abantu baseNorth West abanethemba lokuba iya kwenza umahluko nakubadlali abakhulayo abanomqweno wokudlala ibhola ekhatywayo kwinqanaba eliphezulu.
Umdlalo wokuqala uzakuba phakathi kweChiefs neBuya Msuthu. Amakhosi, aziintshatsheli ezikhuselayo, kulindeleke adlalise abadlali abatsha abaquka uKhama Billiat noLetlhogonolo Mirwa.
Kwangaxeshanye, iChiefs ephantsi kwesandla soqeqesho lukaPatrick Mabedi obambeleyo – kulindeleke ijonge inkqubela eyenzileyo kumalungiselelo wayo esizini entsha eqala kwinyanga ezayo.
Umqeqeshi weBuya Msuthu, uKabelo Sibiya, uxelele iintatheli kutshanje ukuba abadlali bakhe bakhuthazeke kakhulu phambi kokudibana neChiefs.
“Abadlali bethu bakhuthazekile kukudibana neKaizer Chiefs. Nathi singabaqeqeshi sisebenza ngokuzimisela kumalungiselelo womdlalo. Sifumene uJabu Mothibi oncedisa kakhulu kwiiseshoni zethu zoqeqesho,” utshilo uSibiya.
UMark Mayambela, obe yinxalenye yokuphehlelelwa kweMaize Cup, uxelele iintatheli ngezinto ezilindelekileyo kwiChippa phantsi koDan Malesela.
Lo mdlali uthethe nangomdlalo wakhe noThabo Rakhale ekulindeleke uncede iChippa kwisizini entsha. Nayo iChippa iya eNorth West inethemba lokuvavanya abadlali bayo abatsha.
“Sinomqeqeshi oyiqondayo ibhola yethu apha eMzantsi Afrika. UBra Dan ngumqeqeshi osithembileyo ofuna iqela lidlale ibhola ephucukileyo. URakhale ngumdlali osezingeni eliphezulu futhi ongadlala nokuba kukweliphi iqela. Ndicinga ukuba singamelana nokulindelekileyo kwisizini ezayo ngoba izinto ziyathembisa ejimini,” utshilo uMayambela.
Kuvulwe isikolo esixabisa iR106-million KwaMaxhama