UMngqith’uzimisele ukuhlala kwiDawana

Maninzi amaqela adlala kwiPremier Soccer League anomdla kuManqoba Mngqithi olisekela lomqeqeshi kwiMamelodi Sundowns – kodwa yena uthi usazimisele ukuhlala kwindawo akuyo.

UMngqithi wazibalula ebholeni yaseMzantsi Afrika kwiminyaka eyadlulayo ngethuba engumqeqeshi weGolden Arrows.

Nangona engawakhankanyanga ngamagama amaqela amfunayo – uxelele intatheli ye-Independent okokuba akazimiselanga kwaphela ukuyishiya iSundowns.

Ekupheleni kwale sizini, uMngqithi kulindeleke abambe iingxoxo neSundowns malunga nokuhlaziywa kwesivumelwano sakhe sengqesho. Phambi kokufakwa ekhwapheni nguPitso Mosimane – okaMgqithi ukhe waqeqesha ixesha elingabhekelephi AmaZulu neChippa United.

“Ewe…yinyaniso, akhona amaqela athethileyo nam. Kuyandivuyisa ukuqatshelwa komsebenzi endiwenzayo ngoba oko kubonakalisa ukundithemba,” utshilo uMngqithi oneminyaka eliqela ngoku engumncedisi kaPitso othembekileyo kwi Sundowns eyenze imbali ngokuthatha iindebe ezibalulekileyo.

Okwangoku, kuyabonakala okokuba uMngqithi usonwabile kweliqela.

“Andinazo izicwangciso ezingezinye. Andikacingi ngokuhamba kwiSundowns. Liya kufika ixesha lokuba ndiye kwelinye iqela – kodwa okwangoku, ndicinga ukuba kufanelene ndizibophelele kwi Sundowns. Lakuze lifike ixesha lokuba ndihambe – kodwa ngeke ndixoke, elo xesha elikafiki. Kuninzi endisakufunayo apha kwiSundowns njengokuphumelela iMTN 8 engekayithathi ngoku ndikuyo. Ndifuna ukuba yinxalenye yabantu abenze imbali kwiDowns ngokuthatha zonke iindebe. Abanye abaqeqeshi abakwazi ukuwafumana amathuba anjalo. Akukho xinizelelo olunokubangela ndihambe ngoba ndonwabile apha,” utsho uMngqithi.

“Indlela endisebenza ngayo nomqeqeshi intle kakhulu ngoba ungumntu olangazelela impumelelo ngamaxesha onke njengam.

“Okubalulekileyo kum ngoku kukuzama ukuphumeza umnqweno kamongameli weqela uMnu. Patrice Motsepe. Liyeza ixesha lokuba ngumqeqeshi oyintloko kwelinye iqela – kodwa hayi okwangoku,” utsho uMnqgithi.

Akukacaci nokuba isivumelwano sakhe siya kuvuselelwa na njengokuba noPitso engekasivuseleli esakhe.

UMngqithi uthi ukhe wathetha noMotsepe – kodwa akukabikho nto egqityiweyo.