Kuye kwanyanzeleka okokuba uMzantsi Afrika uxoze omnye umphini ngoLwesibini ebusuku emva kokuba iZambia igqibe kwelokuba ihle nomcinga emdlalweni wokucweya obuza kuba seHeroes Stadium ngoMgqibelo.
Izikhulu zeZambian Football Association zithe umdlalo ngeke uqhubele phambili ngenxa yokuhlaselwa kwabantu bamanye amazwe okwenzeke eGoli nasePitoli kule veki.
Ngethamsanqa, uMzantsi Afrika uhlangulwe ehlazweni yiMadagascar evumileyo ukudlala nawo emdlalweni wobuhlobo oza kube useOrlando Stadium ngentsimbi yesixhenxe ngorhatya ngoMgqibelo.
Umdlalo wangempelaveki uza kuba ngowokuqala weBafana Bafana phantsi kwesandla sikaMolefi Ntseki oqeshwe kwiveki ephelileyo yiSafa.
Iqela lesizwe loMzantsi Afrika lilungiselela imidlalo ehlakulela iAfcon elandelayo ekulindeleke idlalwe phambi kokuphela konyaka.
Ekuqaleni kwale veki, uNtseki uthethe neentatheli okokuqala njengomqeqeshi weqela lesizwe. Abalandeli bebhola ekhatywayo abakwamkelanga ukuchongwa kukaNtseki, 50, ngoba bebejonge abaqeqeshi abafana noPitso Mosimane, uGavin Hunt noBenni McCarthy. Emva kokwamkelwa kwakhe, uNtseki uthe ikamva liqaqambile.
“Ndiya kuvuyela ukwamkelwa ngesikipa esinombala oluhlaza ngoba lo nto ithetha ukuthi ikamva liqaqambile. Yiminyaka engamashumi amabini ananye ndingumqeqeshi. Ndifundile, ndikhulile futhi ndinalo ulwazi. Kuninzi kakhulu endikufunde kubaqeqeshi endisebenzileyo nabo, utshilo uNtseki osondeze uTrott Moloto noArthur Zwane njengabancedisi bakhe emdlalweni wale veki.
UNtseki ukuthethelele ukuchonga kwakhe uMoloto noZwane ngelithi ngabantu abanolwazi olunzulu futhi abanokuncedisa kwiqela lesizwe.
“Le nto ayikho ngesiqu sam. Kufanele ibe ngumsebenzi wethu sonke. Sendiqalile ukuthetha nabaqeqeshi bamaqela adlala kwiPSL. Ndicinga ukuba kufuneka kubekho ikomiti eza kujongana nendlela abadlali abachongwa ngayo. Ndithethe noMoloto ngoba ungumntu onamava kakhulu kwimiba yeqela lesizwe nebhola ngokubanzi. Kanti ndisebenze naye ixesha elide uZwane ukusukela mhla ndasebenzela iSafa,” utshilo uNtseki.
Ababezenza amapolisa baphanga usapho, baqhotsa batya inyama yabo!