Umdlali-siswini owayedlalela iKaizer Chiefs, u-Abia Nale, ufake isicelo sokuqhawulwa ngesihle isivumelwano sakhe sengqesho yiMaritzburg United – iqela ebelidlalela ukusukela kwisizini edlulileyo.

Le ndedeba yakwaNale, 30, seyinexeshana noko idlalela eli qela laseMgungundlovu KwaZulu Natal – kodwa ayilifumenanga kakuhle ithuba lokudlala imidlalo ebaleni. Sesona sizathu esibangele acele ukukhululwa, nayo iTeam of Choice isamkele isicelo sakhe.

Njengokuba kufike umqeqeshi omtsha kwiMaritzburg, uRoger de Sa, kwiveki ephelileyo, bekulindeleke ajongwe naye ngokulinganayo nabanye abadlali – kodwa ingxelo ithi umqeqeshi ufika lo mdlali sele esenzile isigqibo.

“Isicelo sam sokuhamba kwagqitywa ngaso kwiiholide zokuphela konyaka ophelileyo. Ndafumana ithuba eloneleyo lokuyicinga le nto,” utshilo uNale kwikhasi lomnatha leTeam of Choice.

“Kulilishwa ukungafumani ithuba lokusebenza nomqeqeshi ophezulu njengoRoger. Bendingathanda ukusebenza naye – kodwa ke isigqibo sathathwa kudala phambi kokufika kwakhe,” uvale ngalo mazwi uNale.

Sona isithethi seMaritzburg United, uBrian Zuma, uthe yinto engemnandanga kubo, beli qela, ukuhamba kwalo mdlali.

“Besisenawo umnqweno wokumgcina lo mdlali kweli qela lethu. Asikwazi ngoba isigqibo senziwa kudala futhi yinto efunwa nguye ukuhamba. Simnqwenelela okuhle kwindlela yakhe,” utshilo uZuma.

UNale wafika kwiMaritzburg United ngethuba isaqeqeshwa ngu-Ernst Middendorp onikezele ekupheleni konyaka ophelileyo. Ebengadlali ngamaxesha onke nangethuba esekhona kodwa naphantsi kukaMiddendorp. Mhlawumbi ubonile ukuba ukufika kukaDe Sa akungeze kumncede, wakhetha uyokuzama ithuba kwenye indawo kwangoku kusavulwe ithuba lokuthengwa kwabadlali kwiPSL.

Yenza iinguqu iMaritzburg kuba izama ukubaleka izinto ezenzeke kwisizini ka’2015/16 ephantse yathityiselwa kuyo.