UNcikazi uzingomba isifuba ngomsebenzi weGolden Arrows emva kokuphumelela iQ2 Innovation

Umqeqeshi weGolden Arrows, uMandla Ncikazi, uthi uzingoba isifuba ngomsebenzi omhle owenziwe liqela lakhe ukusukela oko kuthe kwaqala isizini. Oku kuthethwe nguNcikazi emva kokuba Abafana Bes’thende benze imbali ngokuphumelela iQ2 Innovation okokuqala kwimbali yebhola ekhatywayo. Isibhengezo ngewonga elikhatshwe sisigidi esinesiqingatha serandi (R1.5-million) senziwe yiPSL ngoMvulo, ekuqaleni kwale veki. Ngumsebenzi omkhulu lo owenziwe nguNcikazi – othathe iintambo ezishiywa uSteve Komphela owasabela ubizo kwiMamelodi Sundowns emva kokuhamba kukaPitso Mosimane ekuqaleni kwesizini.

Abafana Bes’thende boyise iSundowns ebiqhube kakuhle nayo kwiQ2 Innovation – eyasungulwa kwiminyaka edlulileyo ngelizama ukukhuthaza amaqela adlala kwiPSL. “Okubalulekileyo kuko konke kukubulela abadlali bethu nabaqeqeshi ngefuthe labo elithe lasinceda ukuze sikwazi ukuqokelela amanqaku amaninzi ngaphezulu kwamanye amaqela (akhe aphumelela iQI) emidlalweni esixhenxe,” utshilo uNcikazi ngovuyo olukhulu.

“Ngenxa yomfutho senze imbali ngokuba liqela lokuqala KwaZulu-Natal eliphumelele into enjena. Ngaphezulu kwalo nto, amanqaku alishumi elinesithandathu esiwazuzileyo nemidlalo esiyiphumeleleyo mininzi ngaphezulu kunamaqela awakhe aphumelela iQ Innovation ngaphezulu. Andiqondi ukuba akhona amazwi anokucacisa indlela endizingomva isifuba ngayo ukuba yinxalenye yeGolden Arrows,” Impempe.com, imcaphule ngaloo mazwi uNcikazi. Umqeqeshi unethemba lokuba Abafana bes’thende baza kuloleka liwonga abalifumeneyo.

“Endikuthandazelayo ngoku kukuba impumelelo yethu isilole ukuze sihlale sikulambele ukufumana iQ Innovation elandelayo. Lo nto singayenza ngokuqokelela amanqaku alishumi elinambini emaqeleni aseLimpopo aza kudlala nathi ebaleni lethu, iSugar Ray Xulu Stadium,” utshilo uNcikazi, onexhala kuba amaqela eza kuyijonga ngenye iGolden Arrows ukusukela ngoku. “Kufuneka sibambelele kwindlela esenza ngayo izinto ngoba okulindelwe kuthi kukhulu ngoku. Kumnandi kodwa ngoba iingqondo zethu beziphilile ngoba besingadlali neqela sibe sijonge indawo elikuyo,” utshilo uNcekazi.wabo.