UNdoro uza kuhamb’ ebotyoz’ umnqwazi emva kokuchithwa yiHighlands Park

Nangona
isizini ingekavalwa – kodwa amanye amaqela sele eqalile ukukhulula abadlali. Namhlanje
kuvakele iindaba ezithi ifolosi yaseZimbabwe, uTendai Ndoro, uchithiwe liqela
lephondo laseGauteng, iHighlands
Park. Njengokuba imidlalo
yebhola ekhatywayo isanqunyanyisiwe ngenxa yekhorona, amanye amaqela adlala kwiPremier
Soccer League aye agqiba kwelokuba ayiphungule imivuzo yabadlali ngenxa yokuncipha
kwengeniso kwezemidlalo echaphazele kakubi phantse yonke imidlalo ngokohlukana
kwayo. UNdoro, 35, ngomnye wabadlali okuvakala iindaba ezithi umvuzo wakhe uye
wacuthwa ngamashumi amabini onke eepesenti (20%). Ukuhamba kwakhe kubonakala
ngathi kuphenjelelwe yilo nto. “SiyiHighlands
Park sithi masinazise okokuba
sohlukane ngesihle noTendai Ndoro. Esi sisigqibo esiphume naso kwintlanganiso
ebiphakathi kwethu naye izolo (ngoLwesibini). Simnqwenelela okuhle kodwa
sikwabulela igalelo lakhe kananjalo,” itshilo ingxelo ekhutshwe ekuseni
namhlanje.

Lo nto
ithetha ukuthi uNdoro kufuneka ahambe ebotyoza umnqwazi kumaqela anganomdla
kuye kwakhona phambi kokuvulwa isizini entsha ukuba ikhorona iye yalipha umtyhi
ihlabathi. UNdoro ngumdlali oyifolosi owaziwayo ebholeni yaseMzantsi Afrika
emva kokuzibalula ngokufaka amagowuli kumaqela afana neMpumalanga Black Aces,
i-Orlando Pirates ne-Ajax
Cape Town. Ufike kwiHighlands
Park ekuzeni kuphela konyaka ka-2019
emva kokushiya iAjax Cape Town
eyathotyiselwayo emva kokuthathelwa amanqaku ngenxa yokumdlalisa (uNdoro)
engafanelanga ukudlala emidlalweni yePSL. Akukho mahluko awenzileyo uNdoro kwiHighlands Park ngoba ufake ibathwana lamanqaku
amahlanu qha emidlalweni engaphaya kwamashumi amabini anesihlanu. Phambi
kokuthathwa liqela lika-Owen Da Gama, kwakukhe kwavakala into ethi iKaizer
Chiefs inomdla kuye. Okwangoku, akukacaci nokuba leliphi iqela aza kulidlalela
kwisini ezayo ukuba uhleli eMzantsi Afrika.