Owayefudula eyifolosi yoMthatha Bush Bucks, uNkosi uMongi Rula, usole ukufuduka kweBizana Pondo Chiefs njengonobangela wokungaqhubi kwayo kakuhle kwiGladAfrica Championship. Inkosi ikuthethe oku kwindibano ebikhwetywe yiMotsepe Foundation ebiyokupha amaqela waseBizana angamashumi amane iimpahla zokudlala ibhola kwiveki ephelileyo. Kwiiveki ezigqithileyo, iPondo Chiefs ibuyele kwi-ABC Motsepe League emva kwesizini enye kwinqanaba eliphezulu lebhola ekhatywayo. Eli qela lasemaMpondweni lanyanzeleka ukuba lifudukele KwaZulu-Natal ngenxa yokungabikho kwamabala asemgangathweni ofunwa yiPSL kwiindawo ezifana neBizana noMthatha.
Ukusuka kwePondo Chiefs endaweni exhaswa kuyo eBizana – kubonwe njengeyona nto ebangele ingakwazi ukuzinza kwiGladAfrica Championship. “IPondo Chiefs liqela lalapha eBizana, ebelisimele apha eMpuma Koloni. Ngelishwa ke libuyele kwiMotsepe League. Sibubukukani siyayazi into ebangele iPondo Chiefs ibuyele ezantsi. Akukho nto imbi njengokungabinalo ikhaya lakho. Ukungadlaleli ekhaya yenye yezinto esicinga ukuba ibachanile. Sibubukumkani bamaMpondo sithi akulahlwa mbeleko ngakufelwa,” utshilo uNkosi uRhula. Nangona iqela lakhe lehliselwe kumgangatho osezantsi, uMnu. uNathi Mqokiyana, uthe yenzekile into ebeyifuna.
“Ndibulela abantu baseBizana ngokundinika ithuba lokukhokela iPondo Chiefs. Injongo yam yayikukuvulela abantu abatsha amathuba ebomini babo. Elam iphupha lifezekisiwe ngoba kukho abadlali abafumene amaqela abaza kuwadlalela,” utshilo uMqokiyana. Emva kokuqeqeshwa ngamadoda afana noTshepo Motsoeneng, uJulius Dube noClinton Larsen – izinto aziyihambelanga kakuhle iPondo Chiefs ebizamile ukuqokelela abadlali ababekhe badlala kwiPSL. Ivale isizini isekugqibeleni, iqokelele amashumi amabini anesithathu qha amanqaku emva kokuphumelela imidlalo emihlanu kwengamashumi amathathu.
Africa title the first of many for Khayelitsha’s Mgabi