UNtshangase uyibethelele indawo yakhe kwiBafana

Abadlali abatsha kwiqela lesizwe baxiphule umxhelo kaStuart Baxter kwimidlalo yakutshanje.

UMzantsi Afrika ubethe iBotswana ngegowuli elinye (1-0) elifakwe nguRyan Moon kwimpelaveki egqithileyo eMoruleng Stadium.

Kanti le mpumelelo ilandela omnye umdlalo iBafana Bafana ebethe kuwo iBotswana ngo’2-0. Kuyo yonke le midlalo ebesebenzisa abadlali abatsha nabo bangafumani thuba kakhuhle kwiBafana – kodwa uSiphelele Ntshangase umshiye engawuvali umlomo uStuart Baxter. Lo mqeqeshi upoqa izinto ezintle zodwa emlonyeni wakhe ngalo mdlali-siswini weBlack Leopard.

Ezi ndaba zimnandi zimfikela uNtshangase efunwa ngapha nangapha ngamaqela afana neKaizer Chiefs neMamelodi Sundowns.

Lo nto ingamncedisa kwicala lokwandisa amathuba okuthengwa kwakhe njengokuba efuna ukudlala kwiPSL kwisizini ezayo.

Ngokudlala kakuhle kumdlalo odlulileyo, abadlali abafana noNtshangase noMoon ngekhe balityalwe nguBaxter xa elungiselela umdlalo ophakathi kweBafana Bafana neCape Verde kwezi nyanga zizayo.

“Soze ndiphosise, bendingamazi lo mdlali – kodwa akubanga thuba lide ukumqaphela. Xa ephethe ibhola kubakho umahluko. Ayinguye yedwa umdlali ozibonakalisileyo, nto nje yena uye wagqama. Ndiyakholwa ukuba angaya kwelinye inqanaba kwiBafana Bafana. Xa iqela lizama ukuzikhusela ubakhona, uyamamela futhi uyayithobela imiyalelo yomqeqeshi. Umgumdlali ofunekayo ngoba ufunda ngokukhawuleza emdlalweni,” utshilo uBaxter.

Ithuba alifumeneyo uNtshangase ebelidinga kakhulu kwikhono lakhe kwaye ngoku ukonwabele ukudlalela iBafana Bafana. “

Umqeqeshi ebesoloko esishumayeza ukuba singayideleli iBotswana kuba siyibethele kowayo. Ebesigadile kakhulu; lo nto khange ayifihle kuthi sonke. Ndiyamthanda umqeqeshi onjalo ngoba uyayazi into ayifunayo,” utshilo uNtshangase.

Ngoku uMzantsi Afrika uzakudibana kwinyanga ezayo neZambia emva kokuba ibethe iSwaziland ngo’7-0.

UBaxter ukutyelelo phesheya apho ayokujonga abanye abadlali.