Emva kweshumi leminyaka, uHlompho Kekana uxelelwe ngabaqeqeshi ukuba akasafuneki kwiMamelodi Sundowns. Sekulithuba kuthethwa ngekamva likaKekana emva kokuba uManqoba Mngqithi noRulani Mokwena bengamsebenzisanga emva kokuhamba kukaPitso Mosimane kunyaka ophelileyo. UKekana wafika eChloorkop kwisizini ka-2011/12 emva kokudlalela amaqela aquka iBloemfontein Celtic, iSuperSport United neBlack Leopards phakathi kwamanye.
Eminyakeni elishumi ayihleli kwiSundowns, uKekana udlale amakhulu amathathu anamashumi amahlanu anesithandathu emidlalo. Iindebe azifumeneyo kwiSundowns zilishumi elinesithathu. Ziquka iindebe ezintandathu ze-Absa/DStv Premiership, ezeNedbank, ezeTelkom Knockout, iCaf Champions League, iCaf Super Cup neShell Helix Ultra Cup.
UKekana ebengomnye wabadlali abafika nenguquko kwiSundowns phantsi kukaMosimane – owafika kuyo isokola nangona yayichitha izigidi zerandi ebadlalini abatsha isizini nesizini. Abaqeqeshi baqala babalula ubudala bakhe njengeyona nto ebangela bangamadlalisi nangoba ebesenamandla ebaleni.
Phambi kokuqala kwesizini, bekukho iingxelo ezithi iSundowns ifuna ukumnika iSwallows FC ngemboleko – kodwa kuthiwa uKekana wayikhaba lo nto ngelithi ufuna ukulwela indawo yakhe. Okuthe kwacaca ngoku kukuba akafunwa ngabaqeqeshi, kangangokuba bathe makayeke ukuzilolonga nabanye abadlali. Ayikho indawo yakhe kwiSundowns, leyo into icace gca okwekati emhlophe ehlungwini.
Ayinguye yedwa uKekana ochwethelwe ecaleni ngabaqeqeshi abakhoyo, uTiyani Mabunda ukhethe ukuthatha isikhundla endaweni yokukhangela iqela elitsha anokulidlalela emva kokuxelelwa ukuba akasenayo indawo kwiSundowns. Ngaphandle komsebenzi omhle awenze kwiSundowns, uKekana ukwazile nokudlalela iqela lesizwe loMzantsi Afrika izihlandlo eziliqela.
Belingekacaci kakuhle inyathelo eliza kuthathwa yiSundowns njengokuba isivumelwano sikaKekana siphelelwa ngo-2024. Umdlali onjengoKekana ngeke adinge iqela eMzantsi Afrika – kodwa kunokwenzeka ukuba amaqithiqithi yeyona nto ebibangela kubenzima ukushiya iSundowns nangona engqinitywa ngabaqeqeshi bakhe.
IMIFANEKISO – EPWP: Imibhiyozo yeminyaka engamashumi amabini