Iqela lesizwe leqakamba, iProteas, libhale iincwadi zembali ngokutsha kule veki ngethuba linqunqela egoqweni ilizwe laseAustralia kumdlalo wovavanyo ngemitsi elikhulu neshumi elinethoba (119) eWanderers Stadium.
Emva kotyelelo lweAustralia, amakhwenkwe elizwe loMzantsi Afrika azingomba isifuba ngokuyivuthulula ngemitsi engamakhulu amane anamashumi asithoba nesibini kumdlalo wovavanyo wesine.
Le mpumelelo (ka’3-1 kwimidlalo yovavanyo) izuzwe yiProteas inkulu kakhulu, kangangokuba yinto entsha engazange yenzeka kwiminyaka engamashumi amabini anesine eWanderers.
Umtshutshisi omkhulu okwathe wangumdlali othe waqaqamba nguVernon Philander – umdlali weqakamba ozibalule ngokugibisela kwimidlalo yehlabathi.
Le ndedeba yakwaPhilander iwise oothinti abathandathu emva kwebathwana leebhola ezingamashumi amabini ananye qha.
Ukudlala kakuhle kwakhe uPhilander kumbeka phakathi kwamadoda angoompondozihlanjiwe kwihlabathi kwicala lokujula iqakamba.
Phakathi kwabantu abanebhongo ngomsebenzi owenziwe ngulo mdlalo ngumqeqeshi weProteas, uOttis Gibson. Umqeqeshi weProteas uthe uchulumance kakhulu ngoba kukho umsebenzi ebethe makayenze emidlalweni uPhilander.
“Ndoneliseke ngokukodwa ngumsebenzi owenziwe nguPhilander ngoba uyenze yonke imisebenzi endambekela yona ekuqaleni kwehlobo. Simbonile enyuka esehla ethatha oothinti. Udlale umdlalo omhle kakhulu kwaye sonelisekile yindlela asebenze ngayo. Ngoyena mdlali obeyingozi kubo uPhilander. Sidlale umdlalo ongcono eBhayi kwaye ukuzithemba kuye kwakhula emva koko,” utshilo uGibson.
Iqela lesizwe laseAustralia ligoduke lithokombise iintloko kwaye lithe gabhu ehlazweni emva kokuba uKapteni uSteve Smith, uDavid Warner noCameron Bancroft bebanjwe besenza ubutshilikithi ngebhola kutshanje.
Isenzo saba badlali sanyanzela iziphathamandla zeqakamba ukuba zibasike kwiqakamba ithuba elide bengadlali.
Ababezenza amapolisa baphanga usapho, baqhotsa batya inyama yabo!