UPogba ubetha ngenqindi phantsi ngelithi aliphandlwa kabini

Ngentsimbi
yesihlanu emalanga ngeCawe kuzaw’qhawuka unobathane ngenkqu kumdlalo ojongwe
ngamehl’abomvu ngabalandeli bebhola kwihlabathi lonke. Ngomso iFrance neCroatia
ziza kududlana okweenkunzi zegusha kumdlalo wendebe yehlabathi wokugqibela
kwilinge lazo lokuphumelela eyona ndebe inexabiso eliphezulu kwibhola ekhatywayo
eLuzhniki Stadium [eseMoscow] kwilizwe laseRussia. Omabini la mazwe ambonzeleke
kwisigaba sokugqibela sendebe yehlabathi emva kokubetha amazwe amakhulu. Umdlali
ophambili kwiFrance, uPaul Pogba, ubetha ngenqindi phantsi ngelithi: aliphandlwa
kabini.

Ngo-2016,
iFrance yabethwa kabuhlungu yiPortugal ngo’1-0 kumdlalo wendebe yaseYurophu –
lo nto yahlala ezintliziyweyi zabantu belizwe lakhe isisilonda eziqaqambayo. Umdlalo
wangomso ubonwa nguPaul Pogba njengethuba elihle lokuxolisa iintliziyo zabantu
baseFrance. Nguye kuphela umdlali okwindebe yehlabathi kulo nyaka owayekhona
ngoko kwakusenzeka lo nto. Mhlawumbi, yiyo lo nto umdlalo wangomso uthetha
lukhulu kakhulu kuye njengomdlali weFrance. “Siyayazi imeko esikuyo.
Asizimiselanga ukwenza impazamo esayenza kwiminyaka emibini edlulileyo. Sizimisele
ukusebenza ngokukhulu ukukhuthala ukuze siye nayo ekhaya le ndebe. Ngokuya sasidlala
nePortugal; sacinga ukuba sesiyiphumelele singekadlali. Ngeke iphinde yenzeke
lo nto,” utshilo uPogba ethetha neentatheli eRussia.

Iyisokolele
kekambe indawo ekuyo iFrance, kuye kwanyanzeleka ukuba igqithe kumazwe aquka iAustralia,
iArgentina, iBelgium, i-Uruguay namanye. Yiyo lo nto kunyanzelekile abadlali
bayo ukuba bazinyuse iikawusi ngoba iCroatia ayichamisi futhi ibetha izinto
eziwayo. iCroatia ibonisile ukuba iyakwazi ukujika amatye abe zizonka
kwimidlalo ebethe kuyo iRussia neNgolane kutshanje kwindebe yehlabathi. Uyavuma
kekambe uPogba ukuba iFrance iza kudibana nelizwe elinzima ngomso. “Idlale umdlalo
onzima iCroatia futhi ilandela ngasemva. Ngoba inabadlali abavutshiweyo
engqondweni, iphethe iphumelela. Kumdlalo wokugqibela kuzakube kukho amaqela
amabini, indebe nemizuzu engamashumi alithoba. Asithandabuzi ngoba sidlala
ngokubambisana thina sonke – yinto esixhathise ngayo leyo. Sizimisele ukwenza
konke okusemandleni wethu ukuze siphumelele,” utshilo uPogbba.

ICroatia ifuna
ukubuyisa izitya ngoba yabethwa yiFrance ngo’98 – unyaka iFrance eyaphinda yathatha
ngawo indebe yehlabathi elizweni layo. Kwangaxeshanye, iCroatia izakube ifuna
iphumelela indebe yehlabathi okokuqala. UPogba uthi abazukwenza mpazamo
yokubeka iliso [labo] kuLuka Modric yedwa ngoba kukho abanye abadlali abayingozi
abafana noMario Mundzukic, u-Ivan Rakitic no-Ivan Perisic. “Sinaso isicwangciso
sethu salo mdlalo,” uvale ngalo mazwi uPogba.