UQuinton de Kock uyivumile induku ye-Australia emdlalweni weT20

UMzantsi
Afrika uzikhotha amanxeba emva kokuvuthululwa yi-Australia emdlalweni obutaka
iintlantsi izolo. Amakhwenkwe kaQuinton de Kock abethwe ngemvula yemitsi
engamashumi alithoba anesixhenxe (97) emdlalweni wesithathu weT20 obubanjelwe
eNewlands Stadium, eKapa. Iqela lesizwe lase-Australia leqakamba liqhokre
ikhulu elinamashumi alithoba anesine phambi kokukhutshwa lonke nguMzantsi
Afrika. Abadlali beProteas bakhutshwe bonke benze imitsi engamashumi alithoba
anesithandathu qha. Ukuphumelela kwe-Australia izolo kuthethe ukuthi iphumelele
imidlalo yosuku olunye (T20) emibini komnye ophunyelelwe nguMzantsi Afrika emva
kwemidlalo emithathu edlalwe ngala mazwe mabini. Ukubethwa kweqela likaMark
Boucher kubhence iingxaki ezinzima ekufuneka azame ukuzilungisa emva kokunikwa
uxanduva lokuqeqesha ekuqaleni konyaka phambi kotyelelo lweNgilane.

Khange
akwazi ukuyichaza uDe Kock indlela elibethwe ngayo iqela lakhe ngoba imbi
kakhulu. Amadoda aziwayo oMzantsi Afrika oyisiwe kukumela namadoda ayingozi
ase-Australia afana no-Ashton Agar noMitchell Starc abawise oothinti
ngokungenambaliso eKapa. “Ukuba ndingathetha inyaniso, andazi kwenzekeni.
Sibethiwe qha. Asenzanga ngokwaneleyo kwaye kufuneka sizikhangele thina
singabadlali ngokuzibuza imibuzo. Emidlalweni emithathu esiyidlalileyo; mnye
qha umdlalo esidlale into ebhadlileyo kuwo. Kweminye asiqhubanga kakuhle tu.
Indlela esidlale ngayo ayisiyiyo le sifuna lidlale ngayo iqela,” utshilo uDe
Kock othathe iintambo njengoKapteni kutshanje. Uza kufumana elinye ithuba
uMzantsi Afrika xa uqubisana ne-Australia kwakhona emdlalweni oza kudlalelwa eBoland Park kwidolophi yasePaarl, eNtshona
Koloni, eminimaqanda (13:00) ngoMgqibelo.