USaleng angayihlangula futhi iBucs kwiDowns?

Oyena mdlalo ojongwe ngamehlo abomvu ngabalandeli bebhola ekhatywayo kwimpelaveki ezayo ngulowo uphakathi kwezangxa zebhola yaseMzantsi Afrika, i-Orlando Pirates neMamelodi Sundowns equsha kwanto ephambi kwayo. IPirates yamkela iSundowns emdlalweni weDStv Premiership oza kube use-Orlando Stadium ngentsimbi yesithathu emalanga ngoMgqibelo. Kunyanzelekile AmaBhakaniya aqule aligangathe phambi komdlalo wangempelaveki ukuze akwazi ukuwisa iSundowns eyingxaki. Emdlalweni wokuqala weDStv Premiership, iSundowns yaphumelela ngamagowuli amabini eqandeni. Yayibuyisa isixhiba emva kokuba yabethwa yiPirates emdlalweni weMTN8.

Kuloo mdlalo wonyaka ophelileyo, uMonnapule Saleng wayibethe eyedwa iSundowns. Umbuzo: ingaba uSaleng angayihlangula na iPirates kwiSundowns eyagqibela ngaloo mdlalo ukubethwa? Lo umbuzo uya kuphendulwa ngabadlali bePirates ebaleni. Emva kokubetha iGolden Arrows neStellenbosch ngemvula yamagowuli emidlalweni egqithileyo, iPirates iza kwamkela iSundowns ngexesha elilungileyo. Ingxaki yayo enkulu iPirates ibikukungafaki amagowuli. USaleng, uKermit Erasmus noVincent Pule ngamadoda anokulinceda iqela likaJose Riveiro nangona iSundowns iza kuya emdlalweni ikelemile.

Akululanga ukubetha iSundowns ngoba idlalela ukuphumelela ngamaxesha onke futhi abadlali bayo bayazimisela ebaleni. Iya eSoweto ifuna amanqaku ukuze ivule umsantsa phakathi kwayo namaqela aza emva kwayo phambi kokuba ixakekiswe yimidlalo yeCAF Champions League kule nyanga. Ezimnyama ziza kufunqulwa kukufika kukaMakhehleni Makhaula obekade edlalela AmaZulu. Amkhulule ngoba ebesevumelene nePirates ukuba uza kuyidlalela kwisizini ezayo. Njengoba bekuvalwa ixesha lokuthenga abadlali, iChippa United ifumene uTshepo Matete; iSwallows ifumene uBongani Sam; iSuperSport United ifumene uZakhele Lepasa kanti yena uDan Malesela ugxothiwe yiMarumo Gallants, indawo yakhe yathathwa nguDylan Kerr.

Imidlalo yeDStv Premiership:

Lwesihlanu: Swallows vs Richards Bay @Dobsonville Stadium, 18:00; Maritzburg United vs AmaZulu @Harry Gwala Stadium, 19:30

Mgqibelo: Golden Arrows vs Royal Am @Princess Magogo Stadium, 15:30; Chippa United vs Stellenbosch FC @Nelson Mandela Bay Stadium, 15:30; Orlando Pirates vs Mamelodi Sundowns @Orlando Stadium, 15:30; SuperSport United vs Cape Town City @Lucas Moripe Stadium, 17:30; Marumo Gallants vs Sekhukhune United @Royal Bafokeng Stadium, 20:00