USam Nurkovic uyingcwab’ iDowns emdlalweni obutak’ iintlantsi eLoftus Versfeld Stadium

Amagowuli
amabini afakwe nguSam Nurkovic ancede iKaizer Chiefs engcwabe iMamelodi
Sundowns emdlalweni we-Absa Premiership obutaka iintlantsi eLoftus Versfeld
Stadium. Ukuphumelela kweKaizer Chiefs emdlalweni wanamhlanje kuyinike ithuba
lokuphefumla nokuvula umsantsa wamanqaku amahlanu phakathi kwayo neSundowns
esenomdlalo esandleni. Kuye kwanyanzeleka uPitso Mosimane axoze omnye umphini
emva kokuba uThemba Zwane engakwazanga ukudlala namhlanje ngenxa yokonzakala.
Kanti yena uErnst Middendorp uqale umdlalo ngoWillard Katsande nomdlali osemtsha,
uNjabulo Blom, odlale umdlalo omhle kakhulu. Amasandawana adlale kakuhle
ekuqaleni komdlalo esebenzisa iifolosi zawo eziyingozi ezifana noJose Ali Meza
noMauricio Affonso. Unozinti weChiefs, uDaniel Akpeyi, kuye kwanyanzeleka
okokuba asebenze kakhulu kwakwisigaba sokuqala.

Emva kokuya
kwixesha lokuphumla Amakhosi ehamba phambili ngegowuli eqandeni, abuye athatha
apho ebeyeke khona nakwesesibini isiqingatha. Umdlalo ubunzima kakhulu esiswini
bgoba kulapho uWillard Katsande noHlompho Kekana bebekhuphisana khona
ngokulawula umdlalo. Ukuba uMeza ebekwazile ukusebenzisa amathuba awafumeneyo
emdlalweni, iSundowns ngeyikwazile ukuphumelela ngaphandle kwamathandabuzo. Kodwa
elona thuba liyekwe ngu-Andile Jali ephambi kukanozinti. UMiddendorp ufake
uDumisani Zuma obene galelo kwigowuli lesibini likaNurkovic kwisigaba sesibini
somdlalo. UMauricio Affonso ngomnye wabadlali abangakwazanga ukusebenzisa
amathuba emdlalweni wanamhlanje. Iphulukene kanjalo nomdlalo wayo wokuqala
iSundowns kule sizini. Impumelelo yeChiefs iza kuyinceda njengokuba
ilungiselela ukudibana ne-Orlando Pirates emdlalweni weTelkom Knockout oza kube
useMoses Mabhida Stadium.

Sundowns: Mweene, Ngcongca, Morena, Madisha, Lebusa, Langerman,
Jali, Kekana, Vilakazi, Sirino, Meza.

Amalalela: Pieterse, Affonso, Mabunda,
Mahlambi, Lakay, Coetzee, Maboe.

Chiefs: Akpeyi, Frosler, Sasman, Cardoso,
Mathoho, Blom, Katsande, Manyama, Nurkovic, Billiat, Castro.

Amalalela: Bvuma, Maluleka, Kambole, Zulu,
Zuma, Ngezana, Mashiane.