UStuart Baxter utyhile kwelinye iphepha

Umqeqeshi weBafana Bafana, uStuart Baxter, uzimisele ukuyiguqula imbonakalo yeqela lesizwe ukusukela ngoku ukuya phambili.

Oku ukubonakalise ngokuthi abhengeze amagama wabadlali abalishumi elinesine nomqeqeshi olisekela wePirates afuna babe yinxalenye yeqela lesizwe phambi kokuya kwitumente yamazwe amane ezakube iseZambia.

Kwiveki ephelileyo uBaxter unyanzelwe yiSafa ukuba aye kwitumente eza kudlalwa ngamazwe amane: uMzantsi Afrika, iZambia, iZimbabwe neAngola, ekulindeleke iqale ngomhla wamashumi amabini ukuya kowamashumi amabini anesihlanu kule nyanga.

Ngaphandle kohlokondiba lwabadlali abatsha, uBaxter wothuse umzi ngokuthi ameme isekela mqeqeshi leOrlando Pirates, uRhulani Mokwena, ukuba abe yinxalenye yeBafana kwitumente ezayo.

UMokwena ngomnye wabaqeqeshi abasakhulayo abahlonitshwayo eMzantsi Afrika kwaye indlela asebenza ngayo noMilutin Sredojevic ifana nqwa naleyo wayesebenza ngayo noPitso Mosimane kwiminyaka edlulileyo kwiMamelodi Sundowns.

Ngokumbiza, uBaxter ukhangela indlela anakuthi aphungulele ngayo abaqeqeshi ulwazi ngebhola ekhatywayo.

“Simema uRhulani Mokwena oncedisa kwiPirates ukuba eze enkampini yethu ngoba sifuna ukuqinisekisa ukuba bayaxhotyiswa abaqeqeshi abasafufuzayo. Uyakuthi akufika sibone indlela esinokusebenza ngayo naye,” utshilo uBaxter.

Abadlali abatsha nababuyele kwiBafana Bafana baquka abadlali abafana noBuhle Mkhwanazi, uDarren Keet, uBrandon Petersen, uReeve Frosler, uRamahlwe Mphahlele, uDaniel Cardoso, uSiphesihle Ndlovu, uTebogo Mokoena, uInnocent Maela, uRyan Moon, uLebo Mothiba, uAubrey Modiba noThembinkosi Lorch. Umdlali siswini uAndile Jali akachongwanga kuba onzakele.

Le tumente iza kunceda iqela lesizwe elizama ukuzibekela indawo kwitumente yeAfrika (Afcon) elandelayo emva kokungakwazi ukuya kwiFifa World Cup ezakube iseRussia kulo nyaka.

“Aba badlali bakusebenzele ukuqukwa kwabo kwiBafana Bafana – kodwa kufuneka kubekho indlela yokusebenza ukuze sisebenze ngendlela ecacileyo,” utshilo uBaxter.