Kugqityiwe, uTeboho Mokoena ngumdlali weMamelodi Sundowns ngokusesikweni. Oku kubhengezwe yiSuperSport United ngenjikalanga yanamhlanje. UMokoena, 24, ukhethe ukuya kwiSundowns emva kokwayanyaniswa neqela laseYurophu neKaizer Chiefs ixesha elide apha eMzantsi Afrika. Ingxelo ithi lo mdlali waBafana Bafana uzibophelele ngesivumelwano sengqesho seminyaka emine yonke kwiMamelodi Sundowns ekulindeleke ikhusele indebe yeDStv Premiership eyizuze kwisizini egqithileyo. “Siyaqinisekisa okokuba iSuperSport United neMamelodi Sundowns zivumelene ngokuthengiselana uTeboho Mokoena ngemali engachazwanga,” itshilo ingxelo ebhaliweyo ekhutshwe kumakhasi onxibelelwano yiSuperSport.
“UMokoena waqala ukudlalela iSuperSport Academy kwisizini ka-2014/15 esuka kwiVirginia Sports Academy. Wenza umahluko omkhulu efika, wabonakala ngethuba enceda Amatsatsantsa aphumelela iMetropolitan Cup kabini. Emva koko waye wanyuselwa kwiqela labadlali abadala. Ukusukela ngomhla awaqala ngawo ukudla, uMokoena udlale imidlalo engaphantsi kancinci kumakhulu amabini afake kuyo amagowuli angamashumi amabini. Ngomnye wabadlali abaphambili abenze indiba ebonakalayo ukuze iSuperSport United iphakamise iindebe ezifana neMTN 8, iNedbank nakwiCAF Confederation Cup eyabethwa kuyo emdlalweni wokugqibela ngo-2017,” itshilo iSuperSport United. Kwelinye icala, uMokoena ukwangumdlali waBafana Bafana, uyidlalele iSA Under-23 waya kwimidlalo ye-Olimpiki ebibanjelwe eTokyo ngo-202.
Ababezenza amapolisa baphanga usapho, baqhotsa batya inyama yabo!