UTeboho ufuna bazithembe abadlali beChippa

IChippa United iphantsi koxinizelelo, ngakumbi emva kokutshintsha umqeqeshi kwiveki ephelileyo.

Umqeqeshi obambeleyo, uTeboho Moloi, uzimisele ukuguqula izinto – into engumqobo uthi kukuzithemba kwabadlali okusezantsi. Emva kotshintsho lomqeqeshi ukuphazamiseka kwabadlali bekulindelekile.

UMoloi ungene endaweni kaDan ‘Dance’ Malesela emva kokubethwa kweChippa United ngo’3-1 yiBaroka FC kumdlalo wePSL kutshanje.

Phantsi kukaMoloi, iChippa iqokelele amanqaku amabini kwimidlalo emibini.

Kwiveki ephelileyo, iChippa United idlale ntanganye ngo’0-0 nePlatinum Stars. NgoLwesibini kulandele iSuperSport United kumdlalo obuseLucas Moripe Stadium – nalapho iChippa ibuye nenqaku elinye emva kokudlala ntanganye naMatsatsantsa aPitori ngo’1-1.

Kumdlalo odlulileyo, kubekho intlantsi yethemba ebonakalayo phantsi komqeqeshi omtsha. Abadlali abafikayo banefuthe kwaye kubonakala ngathi ngabo abanokuyisa phezulu kwimidlalo yayo elandelayo iChippa United.

Oyena mdlali engathembela kuye kule sizini nguMoeketsi Sekole osele efake amagowuli amabini. UKurt Lentjies no-Abel Mabaso ngabanye babadlali abafike benza umahluko kwiChippa.

Umqeqeshi uthi kufuneka abadlali bakhululeke ukuze bakwazi ukuphumelela imidlalo. Amanqaku amabini kwimidlalo ekude nekhaya amkelekile – kodwa kunyanzelekile iiChilli Boys ziqokelele amanqaku apheleleyo xa zidlala neBloemfontein Celtic ngo’15:00 eNelson Mandela Bay Stadium ngeCawe.

Emva kokuba iChippa idlale umdlalo ophucukileyo xeshikweni idlala neSuperSport – ngoku likhona ithemba lokuba ingafumana impumelelo okwesibini.

“Sisazama ukulakha eli qela, yiyo lo nto singafuni ukwenza iinguqu ezininzi. Kodwa nangona kunjalo, kuyabonakala ukuba kufuneka sinyuse isantya esidlala ngaso nabadlali babambelele kwindlela yokudlala esigqibe ngayo. Ndiyavuya ngoba abadlali bethu bakwazi ukubuya ngasemva emdlalweni – ndiyaziqhenya ngabo. Abadlali beli qela badinga ukuzithemba qha, ukuba kunganjalo – bangaqubisana naye nokuba ngubani kwiPSL,” utshilo uMoloi.

Imidlalo yePSL:

NgoLwesihlanu: Cape Town City vs Polokwane City @Cape Town Stadium ngo-20:00

NgoMgqibelo: Baroka FC vs Ajax Cape Town @Peter Mokaba Stadium 15:00; Bidvest Wits vs Orlando Pirates @Bidvest Stadium 18:00; Kaizer Chiefs vs Golden Arrows @FNB Stadium 20:00; AmaZulu FC vs Platinum Stars @King Zwelithini 20:15

NgeCawe: Chippa United vs Bloemfontein Celtic @Nelson Mandela Bay Stadium