Uthongathi lufak’ engxoweni amanqaku amathathu

Uthongathi luvule kakuhle ngokuthi lubethe i-EC Bees ngo’1-0 kumdlalo wokuqala kaGroup B wetumente wamaqela adlala kwi-ABC Motsepe League eSisa Dukashe Stadium ekuseni namhlanje. Le midlalo idlalwa ngamaqela atshatsheleyo kumaphondo onke eMzantsi Afrika, ngoku kukhangelwa amabini azakuthi anyukele kwiNational First Division. La maqela aye ohlulelana ngalo mdlalo. Kwisigaba sokuqala bekugunye Uthongathi kwaye belufanelwe ngamagowuli aliqela ukuba amathuba beluwasebenzisile. Zona iinyosi zibuye kwisigaba sesibini ngethuba bekubonakala ukuba Uthongathi ludiniwe. UJoseph Chikili obezama phambili ebeyedwa futhi kunzima ukufaka amagowuli ngoba ebesokolo eyedwa.

Uthongathi luye kwixesha lokuphumla luhamba phambili emva kokufumana igowuli elifakwe nguXolani Slawula kumzuzu wesihlanu umdlalo uqalile. Oko bekufanelekile ngoba leli qela laKwaZulu Natal ebelinamandla phantse isigaba sonke sokuqala. Iqela laseMpuma Koloni, i-EC Bess, iphinde yabetheka ngethuba iphulukana nonozinti wayo uKhanya Mini ngenxa yekwenzakala kwangoko kwisigaba sokuqala.Izamile ukunyusa umgangatho iBees emva kokuba kufakwe igowuli kuyo – kodwa iinzame zabo azizelanga mathokazi. Lusukele kwakhona Uthongathi lusebenzisa iibhola ezinde emaphikweni apho bekudlala uDenklen Ngwetjana noSiyabonga Vilane. Ukuba bebikwazile ukuwasebenzisa kakuhle amathuba wabo abafana baseKZN, bekufaneluba bawongezile amagowuli ngoba ngabona bebenamathuba acacileyo kune Bees.

Iqale inomfutho iBees kwisiqingatha sesibini kwaye kubonakala ukuba ikhangela indlela yokufumana igowuli lokulinganisa. Uthongathi lenze eyona nto ibalulekileyo; ukuvala uJoseph Chikili – eyona folosi iyingozi kwiBees. USiyabulela Shai ufike washukimisa ekungeneni kwakhe kwisigaba sesibini emva kokungena endaweni kaMinenhle Dlongololo. UChikili ubenelishwa ngethuba ibhola yakhe inqandwa yipali emva kokubetha amadoda ebhokisini. Khange bachole naphantsi abadlali beBees ngoba Uthongathi beluchitha kwanto phaya emva. Ukubethwa kweBees kuyibeka phantsi koxinizelelo kakhulu.