UVincent Pule uzakudlalela iKaizer Chiefs!

Kugqityiwe,
uVincent Pule, uzakudlalela iKaizer Chiefs kwisizini ezayo! Eli nxele leBidvest
Wits lixelele iphephandaba laseGoli, Sowetan, ezi ndaba zokuya kwalo eNaturena
namhlanje. Ingxelo ithi lo mdlali wenze isivumelwano sethutyana neChiefs –
kwakuphela le sizini, uzakutyikitya isizivumelwano sengqesho esigcweleyo.
Ukuhamba kukaPule kwiWits kwathethwa ngumqeqeshi wakhe uGavin Hunt – owaxelela iintatheli
ngenye imini okokuba lo mdlali uzakuthathwa liqela elikhulu njengokuba
isivumelwano sakhe sengqesho kwiWits sisondela esiphelweni.

UVincent Pule,
25, uthe uya kwelinye iqela lebhola ekhatywayo ngoba efuna ukukhula kwikhono
lakhe lebhola ekhatywayo. “Njengomntu, kuyafuneka ukhangele ezinye iindawo
onokuthi ukhule kuzo. Ukuya kwam kwiChiefs kungalo nto. Kufike ixesha lokuba
ndikhule ngokwasemdlalweni,” utshilo uPule.

Lo mdlali
wafika kwiWits ngo-2014 esuka kwiqela elincinane elibizwa ngokuba yi-African
Warriors. Kwisizini edlulileyo, lo mdlali ebeyinxalenye yeqela eliphumelele iMTN
8 ne-Absa Premier Soccer League. Ekupheleni kuka-2017, uPule wazenzela igama
ngokufaka igowuli elanceda iWits eyaphumelela iTelkom Knockout. Kungekudala,
kulindeleke ancedise iWits xa idlala kwiCaf Champions League. “Umoya wabadlali
enkampini uphezulu ngoba iqela liqhuba kakuhle. Nangona imidlalo yeCaf
ibonakala ngathi isisiphazamiso – kodwa sizimisele ukuyidlala. Lolunye uxanduva
esilulangazelelayo,” uvale ngalo mazwi uPule.