UVladislav Heric ungene endaweni kaLuc Eymael kwiChippa United

By
Pedro Mapelo
-

UHeric Vladislav ngumcebisi omkhulu weChippa United ukusukela namhlanje. Umfanekiso: ©Muzi Ntombela/BackpagePix

UMnu. Siviwe Mpengesi ubeke ithemba kuVladislav Heric njengomnye wabantu abanokuhlangula iqela lakhe elitsala nzima kwiDStv Premiership. Namhlanje kuqeshwe uVladislav Heric njengomcebisi oyintloko weqela. Sisikhundla esingaphezulu kwesomqeqeshi weqela, uSiyabonga Gwambi – osabambeleyo.

Ukufika kukaHeric kuza emva kokugxothwa kukaLuc Eymael – ekhululweyo kwiiveki ezidlulileyo yiChippa United ngenxa yezityholo zobuhlanga ekuthiwa wazenza engumqeqeshi eTanzania. Yena wayeqeshwe njengomcebisi oyintloko emva kokugxothwa kukaDan Malesela. Kulindeleke ukuba uGwambi noHeric basebenzisane njengokuba iChippa United isazama indlela yokunyukela phezulu kwiDStv Premiership esele inemidlalo elithoba yonke ingasaphumeleli.

“UHeric, oyinzalelwane yelizwe laseSerbia, uyayazi indlela esebenza ngayo iChippa United ngoba wakhe wancedisa ngonyaka eyanyuselwa ngayo isuka kwiGladAfrica Championship. Siyamamkela kwiqela lethu esicinga ukuba liza kuzuza kumava anawo emidlalweni esibhozo eshiyekileyo. Into efunekayo ngoku kukuba iqela livale isizini lisendaweni ebhetele,” utshilo uMnu. Mpengesi.

Umqeqeshi weChippa United uDan Dance Malisela kunye nosihlalo weChippa United uSivuyile Chippa Mpengesi ngethuba kunikezwela amabala amabini, iJan Smuth stadium neBuffalo City Stadium, eziphantsi kolawulo lukaMpengesi. Umfanekiso: BHEKI RADEBE

Emva kokuba iChippa ibethe ngo’1-0 yiBaroka FC emdlalweni wayizolo, ngeCawe iza kuzama ukulwela amanqaku apheleleyo xa idibana neGolden Arrows. UHeric, okhe wasebenza kwiqela laseKapa elikwiGladAfrica Championship, ufika kakubi iChippa United ihleli kwindawo yeshumi elinesihlanu futhi idinga uncedo ngakumbi emidlalweni yeDStv Premiership nangona iqhuba kakuhle kwiNedbank Cup.

RELATED ARTICLESMORE FROM AUTHOR