Kudlule iiveki ezimbini kuphela uWarren Whiteley engadlali kwiLions kodwa kubonakala ngathi lo mdlali uzakuleqwa ukuba alungele ukudlala, phambi komdlalo weLions xa isamnkela iCrusaders ngoMgqibelo.
UWhiteley wafumana ukwenzakala egxalabeni kweyeSilimela kwimidlalo ibiphakathi kweSpringboks ne-Ireland. Emva koko kuye kwavela ukuba lo mdlali akazokwazi ukudlala ixesha elingaka ngeeveki ezintandathu. Ngoku ngenxa yokuba iLions izakudlala umdlalo obaluleke kakhulu, uWhiteley noyikapteni uphinde wafakwa phakathi kwabadlali abazakuthi batyunjwe. Lo mdlali ubhengeziwe kubadlali abangamashumi amabini enesihlanu ekuzakukhethwa kubo, abo bazakudlala neCrusaders. Namhlanje kulindeleke ukuba uWhiteley enziwe uvavanyo ukujonga ukuba ukulungele ngenene na ukudlala.
Isekela mqeqeshi leLions uSwys de Bruin ebeqinisekile izolo ukuba uWhiteley uzakube ekulungele ngenene ukudlala. “Alikatyunjwa iqela, kodwa siqinisekile ukuba uzakube ekulungele ukudlala,” utshilo uDe Bruin.
“UWarren akazokubambana nabanye abadlali kude kufike uLwesine kuba usandula ukuphola ngoku ekwenzakaleni, sizakubona ngoko ke. Iyakuba yinto entle ukuba udlalile. Kwelinye icala, uRuan Ackerman wenze umsebenzi omhle kakhulu ngoku angekhoyo. Wafumana iwonga lokuba ngumdlali ogqwesileyo wosuku kumdlalo wethu neSouthern Kings.”
Ukubizwa kukaWhiteley ayikokuphela kwesigqibo esikhulu ekufuneka sithathwe ngumqeqeshi uJohan Ackerman kule mpelaveki.
ICrusaders ayiloqeka libetheka lula, kwaye lo mqeqeshi uyakufunda lukhulu kwindlela iqela lakhe elibethwe ngayo yiJaguares kwiveki ephelileyo.
Libanjelwe isatifikethi sikaGrade 12 somgunyathi iGosa lezeMpilo