Kusweleke umdlali weMarizburg United kwingozi yemoto ngeCawe. Oku kokwesibini umdlali weTeam of Choice ephulukana nobomi bakhe, kunyaka ophelileyo uMondli Cele naye wathi
wasutywa kukufa kwingozi yemoto. UDlamini
wanyuselwa kwiqela elikhulu leMaritzburg ekuqaleni kwesizini edlulileyo, enyuselwa
nabadlali abafana noSiphesihle Ndlovu, Luyanda Ntshangase noBandile Shandu.
Lo mdlali
odlala esiswini uchithe iminyaka emihlanu kwiTeam of Choice esuka kuMgungundlovu
Academy. Uzibonakalisile kwiMulti Choice Diski Challenge njengokuba wayengomnye
wabadlali ababechongelwe iMDC Player of the Season. Udlale imidlalo emithathu
kwiMaritzburg United kule isizini emva kokungena njengelalela phantsi
komqeqeshi uFadlu Davids.
USihlalo
weMaritzburg, uFarook Kadodia, uthe iqela laziswe ngalo mphanga ekuseni ngeCawe.
Ingozi yenzeke kuhola wendlela uN3 phakathi koMgungundlovu neThekwini. UDlamini
ubengumntu kwesi sithuthi esithe sabhukuqa kwaye uthe waswelekela kwindawo
yesehlo. UKadodia zimkhathazile kakhulu iindaba zokusweleka kwalo mdlali
unamashumi amabini eminyaka obebonakala ukuba unesakhono sokudlala ibhola
ekhatywayo.
“Siphatheke kabuhlungu ngokushiywa nguMlondi, ebengumdlali
odlala kakuhle kwaye enesakhono.Ukhuliswe liqela kumanqanaba asezantsi; yiminyaka
emihlanu ekweli qela kwaye wamela noMzantsi Afrika kwiqela labangaphantsi
kweminyaka engamashumi amabini. Ukuhamba
kwakhe emhlabeni kwethuse iqela lonke kwakunye nabasebenzi. Siyakholwa ukuba
uMlondi ubengumdlali obenekamva eliqaqambileyo ebholeni kwaye sijonge ukuba
azibonakalise kwiPSL,” kutsho uKadodia.
“Siyi
Maritzburg United sithanda ukudlulisa amazwi ovelwano nosapho
lakwaDlamini,sikunye nabo,” utshilo uKadodia.
Luthatha lubeka usapho obeluthenjiswe ngoncedo kumngcwabo womzali ogetyengiweyo!