Umsebenzi wokuqeqesha iSpringboks ngowona unzima nakowuphi na umdlalo ehlabathini, kwaye lo nto ayiphelelanga ebaleni kuphela.
Kanye ngalo mzuzu iqela lesizwe lombhoxo nelikhokelwa ngu-Allister Coetzee lijamene nemidlalo yovavanyo ne-Ireland kwinyanga ezayo, uCoetzee sele eqalisa ukulwa amadabi athile ngaphandle kwebala. Ezi zinto zingaphazamisa izicwangciso zikaCoetzee phambi kwemidlalo emithathu phakathi kweeBoks ne-Ireland kwinyanga ezayo.
Umlawuli ojongana nenkqubo yabadlali kwiSARU, uRassie Erasmus, usandula kubhengeza ukuba uzakuzibandakanya neqela lase-Ireland iMunster ukusukela ngomhla wokuqala kweyeKhala.
UJacques Nienaber nobencedisana noCoetzee esaqeqesha iStormers naye uzakulandela * -Erasmus. Into ezakuxolisa uCoetzee kukuba esi sibini sizakuba khona ukumncedisa phambi kwemidlalo ephakathi koMzantsi Afrika ne-Ireland. Kule mpelaveki sisuka kuyo uDuane Vermeulen odlala kwindawo yesibhozo, nobekwa phambili kubagqatswa kwisikhunda sekapteni yeBoks akukacaci ukuba lijonge kweliphi icala ikamva lakhe.
Ingqonyela yeqela elidlalelwa nguDuane, eToulon, uMourad Boudejellal ithe ayizokwazi ukubabhatala abadlali abahambileyo eFrance baye kumaqela abo esizwe kwinyanga ezayo. Ukudlala kumaqela esizwe yeyonanto inyanzeliswayo ngumbutho olawula umbhoxo kwihlabathi.
Iingxelo ezivakalayo zezokuba i-SARU iyalele uVermeulen ukuba kufuneka abeyinxalenye yeSpringboks ngomhla wesihlanu kwinyanga ezayo, phambi komdlalo wokuqala weBoks ngomhla weshumi elinanye.
Ukuba uVermeulen akakwazanga ukufika eKapa ngeli xesha libekiweyo, kuzakufuneka acacisele iSARU, kwaye azikhulule kwimidlalo yeqela lesizwe lombhoxo.
Imizimba yamajoni oMzantsi Afrika abhubhele eDRC kulindeleke ukuba ifike