Kumnandi kakhulu kuCavin Johnson njengokuba iPlatinum Stars ivale isizini ikwindawo yesithathu kwiPremier League, eyona ndawo iphezulu efunyenwe leli qela kwiPSL.
Oku kwenzekile ngenxa yomsebenzi omhle owenziwe leli qela lasRustenburg nangona libethiwe yiMamelodi Sundowns, iintshatsheli zePSL zesizini ka’2015/16, ngo’1-0 kumdlalo wokugqibela ngempelaveki eLucas Moripe Stadium.
Iqela elifumene indawo yesithathu lifumana ithuba lokudlala kwiCaf Confederation Cup, uyamkele ke lo nto umqeqeshi wePlatinum. “Siyalamkela ithuba lokubonisa isakhono sethu kwimidlalo ye-Afrika. Kuzakufuneka sitshintshe indlela esicinga ngayo nesenza ngayo izinto.
Ndiyavuya ngoba ukudlala imidlalo yeCaf yinto endandiyonwabela ndisekwiSundowns. Yenza imbali iPlatinum Stars ngokubetha i-Al Ahly ngethuba yayisenabadlali abafana no-Aboutrika.
Sifuna ukubuyisa lo mava kwiPlatinum kwakhona,” utsho uJohnson. IPlatinum izakuvula isizini entsha ngomdlalo weMTN 8 neChippa United.
Libanjelwe isatifikethi sikaGrade 12 somgunyathi iGosa lezeMpilo