Iqela lika-Eric Tinkler, iCape Town City, lifumene amanqaku abalulekileyo namhlanje emva kokubetha i-Orlando Pirates ebihamba phambili ngo’2-1. Amagowuli amabini afakwe ngabadlali baseMelika antywilisele iPirates egoduke nomnqongo wegowuli elinye emdlalweni weDStv Premiership obuvutha bhe eCape Town Stadium ngorhatya lanamhlanje. Aye emdlalweni kunzima kuwo amakhwenkwe kaTinkler emva kokubethwa yiSuperSport United emdlalweni wokuqala kulo nyaka mtsha – kodwa namhlanje ajike amatye azizonka emva kokubhukuqa iPirates ehambe phambili ngegowuli elifakwe nguDeon Hotto kwisigaba sokuqala somdlalo.
Bekufanele ukuba Ezimnyama ziye zawusonga umdlalo kwa kwisigaba sokuqala somdlalo ngoba ebekhona amathuba okufaka amagowuli okanye igowuli lempumelelo. UMonnapuleng Saleng noHotto bakhe bazama ukwenza imigudu ngelizama ukufumana igowuli lesibini, ngelishwa iinzame zabo ziwe phantsi. UJuan Camilo Zapata ubhakuzelise umnatha ngebhola entle ayifake ngentloko phambi kokutshintshwa kwamacala. Elo ibe ligowuli lokuqala likaZapata osuka eColombia otyikitywe ekupheleni kuka-2022 yiCape Town City. Kuphele amaqhinga kwiPirates ebisele inethemba lokuncumisa abalandeli bayo enyakeni omtsha.
Abuyile amaqela ekhefini enenjongo enye: ukuphumelela umdlalo. Izamile iPirates ukuhlasela nakwisigaba sesibini somdlalo – kodwa abadlali beCity bebethe qwa, ngakumbi emva kokuba iqela labo lifumene igowuli lokulinganisa. ULekay, uMakola noNodada balwe yade yavula iPirates emva kwisigaba sesibini. Igowuli ephumelele ngalo iCape Town City lifakwe nguDarwin Gonzalez – emva kwebhola ayifumene eyedwa phambi kukanozinti weBucs. Kuthe qabu kuTinkler emva kokuzuza amanqaku amathathu emdlalweni wanamhlanje. Iqela lakhe libila libanda kule sizini kwaye bekukho amahum-hum athi angagxothwa yiCape Town City ukuba ibibethiwe nanamhlanje. Kweminye imidlalo yanamhlanje, iGolden Arrows ibethe iSuperSport United ngo’2-1, iMaritzburg United ibethe iMarumo Gallants ngo’1-0.
Lumka Oliphant: ‘Yekani utywala’