Ekuqaleni kweveli, iChippa United yothuse umzi ngokuchitha ishumi elinesihlanu lonke labadlali.
Phakathi kwabadlali abahambileyo kukho amadoda afana noDiamond Thophola, uTercious Malepe, uMeshack Maphangule, uBoikanyo Komane, uWilliam Twala, uElvin Moyo noKelvin Moyo. Abadlali abafana noThabo Rakhale noRuzaigh Gamaldien bahamba kuqala.
Nangona ukuhamba kwenkitha yabadlali kothusile kodwa ukuhamba kwabadlali abaninzi kuhambelana ncamashi nokwathethwa ngumqeqeshi, uLehlohonolo Seema, owathembisa ngokwenza izinto ngendlela entsha phambi kokuqala kwesizini yokuqala yeDStv Premier Soccer League.
USeema uncede iChippa United yasinda ezembeni ngomhla wokugqibela kwisizini yePSL ka2019/20 emva kokuthatha isihlalo esashiywa nguRhulani Mokwena owayengene endaweni kaNorman Mapeza (oya kwiTshakhuma) kwinyanga yoKwindla ekuqaleni kwalo nyaka.
Emva kokuba kubhengezwe abadlali abahambileyo, iChippa yamkele abadlali abane abatsha.
Amagama abo nguRiaan Hanamub, uEva Nga Bienvenu, uSizwe Mdlinzo noRamasimong Moloisane.
UBienvebu utyikitye isivumelwano seminyaka emibini kwiChippa emva kokudlalela iBidvest Wits ebhangileyo kwisizini egqithileyo. Naye uHanamub yifolosi kodwa esuka kwiJomo Cosmos edlala kwiGladAfrican Championship.
UMdlinzo ubuyela kwiChippa okwesibini emva kokuchitha iisizini ezimbini kwiTS Galaxy kaTim Sukazi. Yena uMoloisane usuka kwiBloemfontein Celtic ebifudula iqeqeshwa nguSeema kodwa ngoku, utyikitye isivumelwano sengqesho seminyaka emibini kwiChippa.
Ukufika kwabadlali abatsha kwamkelwe ngovuyo ngabalandeli beChippa United kumakhasi onxibelelwano, ngakumbi iifolosi ezifana noBienvenu noHanamub ezidume ngokufaka amagowuli ngokungenambaliso nekulindeleke zincedise kakhulu uAugustine Kwem osenokuhamba naye.
USeema uthe ufuna ukwakha iqela ngokutsha aphinde azame nokunika ithuba lokudlala abadlali balapha eMpuma Koloni.
Ababezenza amapolisa baphanga usapho, baqhotsa batya inyama yabo!