Ityikitye unozinti omtsha i-Orlando Pirates namhlanje ogama lingu-Emmanuel Daniel. Lo mdlali osuka kwilizwe laseNigeria uzibandakanye nePirates phambi kokuvalwa komkhusane kwinyanga yokuthengwa kwabadlali abatsha ngamaqela ebhola ekhatywayo. Iingxelo zithi lo nozinti waqala watsala umdla weMamelodi Sundowns – iintshatsheli zeCaf Champions League – phambi kokuthathwa yiPirates.

Ngoku iBucs inoonozinti ababini, uSiyabonga Mpontshane noDaniel, emva kokungabikho koonozinti bayo ababini ethembele ngabo. UBrighton Mhlongo usabanjwe kukonzakala, lo gama uJackson Mabokgwane ezakuhlala ngaphandle imidlalo emibini emva kokunikwa ikhadi elibomvu kumdlalo obuphakathi evekini.

Kumdlalo ophakathi kwePirates neCape Town City, kulindeleke kudlale uMpontshane – obekucingeleka ukuba angakuluhlu lwabadlali abakhululwe ekupheleni kwenyanga ephelileyo. Kwilizwe lakhe, u-Emmanuel Daniel udlalele iqela elinje nge-Unugu Rangers.

Ukugaleleka kwalo Mnigeria kulandela ukukhululwa kuka-Edwin Gyimah yiPirates okuvakala ukuba ucele ukukhululwa ngezizathu ezingachazwanga. Amabhakabhaka adlala neCitizens umdlalo we-Absa Premier Soccer League ozakube useCape Town Stadium ngentsimbi yesibhozo ebusuku ngoMgqibelo. Kanti ngoMvulo, ugqirha Irvin Khoza, kulindeleke abhengeze igama lomqeqeshi omtsha uzakuthatha iintambo ku-Augusto Palacios.