Yintoni imfihlelo kaShalulile oxakileyo kwiDStv Premiership?

Abadlali basemva kumaqela ohlukeneyo kwiDStv Premiership abalali buhlayo xa beza kudlala neMamelodi Sundowns ngenxa kaPeter Shalulile – ofaka amagowuli ngendlela emangalisayo. UShalulile, 27, ufike kwiSundowns ekuqaleni kwesizini eqhubekayo emva kokuthengwa kwiHighlands Park ngenxa yeliso lamagowuli analo. Ngoku uthe chatha kwiDowns. Akoneli nje ekuwafakeni amagowuli, ukwaluncedo kwabanye abadlali ebaleni.

Kule sizini, le ndedeba yaseNamibia seyibhakuzelise umnatha izihlandlo ezisixhenxe kwiDStv Premiership kuphela. Ngenxa yokusebenza kakuhle, uShalulile uthiwe jize ngewonga lomdlali wenyanga ekuqaleni kwale veki. Oku kwenzeka emva kokuba uShalulile efake igowuli elincede iSundowns ebethe iTP Mazembe ngo’2-1 kokwayo emdlalweni weCaf Champions League kwiveki egqithileyo. Umbuzo: yintoni imfihlelo kaShalulile?

“Xa ndithetha inyaniso, ayikokuzilolonga neqela nje kuphela – nam ndisebenza ngokuzimisela ngamaxesha onke,” utshilo uShalulile. “Apho ndisuka khona, nalapha kwiSundowns; mna ndiyashiyeka ejimini emva kokuba iqela ligqibile kuba ndifuna ukuzilola. Soze ndiyiyeke lo nto ngoba yiyo endenze ndabukhali kanje.”

Nangona esebenza ngokukhuthala uShakulile – kodwa ukungqongwa ngabadlali abasemgangathweni ophezulu kunegalelo kwindlela aqhubangayo. “Ndisemtsha kwiDowns. Ndisafunda futhi ndisoloko ndizixelela ukuba mandilivuze iqela ngokundinika ithuba. Into endikhuthazayo kukuba ndingqongwe ngabadlali abandikhuthazayo nabandithembayo,” utshilo uShalulile.

Umqeqeshi waMaZulu, uBenni McCarthy, umncomile kakhulu uShalulile. “Ndiyavuyisana noPeter. Ukufanele ukuwongwa ngoba ungumdlali odlala kakuhle kakhulu. Qhubela phambili usenza njalo, ndiyayithanda indlela osebenza ngayo,” utshilo uMcCarthy, naye obeyokwamkela iwonga lomqeqeshi wenyanga emva kokuvusa AmaZulu adlale imidlalo esixhenxe engabethwanga.

Yena uTapelo Xoki waMaZulu ufumene iwonga legowuli lenyanga. IDowns iza kuqubisana neStellenbosch namhlanje emdlalweni weDStv Premiership ngentsimbi yokuqala. Phakathi evekini, iqela likaMngqithi livuthulule iPolokwane City ngo’4-0 emdlalweni weNedbank Cup.