Amakhosi olule inani lemidlalo angayiphumelelanga layokutsho kwisihlanu izolo emva kokugqagqaniselwa yiPlatinum Stars ngo’2-0 kumdlalo we-Absa Premier Soccer League kwibala iRoyal Bafokeng Stadium. Amagowuli weDikwena afakwe nguSolomon Mathe ngentloko no-Enocent Mkhabela kwisigaba sesibini somdlalo.

Abadlali beChiefs badlale owona mdlalo owake waphantsi kule isizini futhi kungacaci nokuba injongo yabo yintoni; bekungekho nkqu namathuba acacileyo abonisa ukuba bebedlalela ukuphumelela. Indlela edlale ngayo iChiefs kulo mdlalo ichazwe nguSteve Komphela njengehlazo. “Kwisiqingatha sokuqala, abadlali bethu abakwazanga nokwenza nenye kwebezilindelekile. Badlale nje into engacacanga. Isihlazisile indlela iqela elidlale ngayo. Zange ndayibona into enjeya ebomini bam,” utshilo uKomphela obekubonakala ukuba uxhelekile ngaphakathi emdlalweni.

Emva kokuphosa ithuba elihle lokufumana indawo yesithathu xa kuphela le sizini, uKomphela uthethe washiya angalaziyo into angafane ayenze nokuba sele ephantsi koxinizelelo olungakanani na. “Kukudelela okungaphaya kokuqonda ukudlala ngoluya uhlobo unxibe imibala yeChiefs, yinto esifuna ukuyilibala msinya. Neqela elidlala kwinqanaba elisezantsi alidlali ngoluya uhlobo. Mandiyincome iPlatinum Stars, idlale kakuhle kakhulu. Siya kumdlalo olandela sinethemba lokuba bayakuqonda [abadlali] ukuba eli qela lifanelwe ngumdlalo ongcono,” utshilo uKomphela.

Njengokuba le iyisizini yesibini kungekho ndebe eNaturena, uninzi lwabalandeli belunethemba lokuba iChiefs iyakulwela indawo yesibini okanye eyesithathu ukuze ifumane ithuba lokudlala kukhuphiswano lweCaf kunyaka ozayo. Akwenzekanga oko. Lo nto kulindeleke ikhokelele kutshintsho eqeleni.