Zininzi izinto ezifuna ukulungiswa kwiqakamba, utsho uGraeme Smith!

By
Pedro Mapelo
-
Faf du Plessis(c) of South Africa (l) and Graeme Smith (r) during day 2 of the 2018 Sunfoil Cricket Test Match between South Africa and India at Newlands Cricket Ground, Cape Town on 6 January 2018 ©Chris Ricco/BackpagePix

Umlawuli
oyintloko weCricket South
Africa, uGraeme Smith, uthi zininzi izinto
ezifuna ukulungiswa kwiqela lesizwe leqakamba phambi kokuba libuyise isidima
salo. Oku kuthethwe nguSmith otyikitye isivumelwano sengqesho seenyanga
ezintathu ngoLwesithathu wale veki njengomlawuli weCricket SA omtsha emva
kokunqunyanyiswa kobekade ebambele kwiinyanga ezidlulileyo. Iingxelo zithi
uSmith sele elumene iindlebe noKapteni weProteas, uFaf du Plessis, ngelizama
ukufunxa ulwazi ngezona zinto ezibalulekileyo njengokuba iqela lesizwe liza
kulungiselela imidlalo yovavanyo ephakathi kwalo neNgilane. Ngokwengxelo
ekhutshwe ngu-IOL Sport izolo, uSmith kulindeleke achonge umqeqeshi weProteas
oyintloko oza kuthatha indawo eyashiywa ngu-Ottis Gibson. Yena uEnoch Nkwe,
obebambele njengomqeqeshi nomlawuli oyintloko, angalisekela lomqeqeshi omtsha. Zonke
ezo nguqu zingenziwa phambi kokusongwa kwalo nyaka ngoba uMzantsi Afrika
unemidlalo oza kuyidlala namazwe afana neNgilane ne-Australia ekuqaleni konyaka
ozayo (2020).

USmith
usamkele isikhundla akuso ngoku emva kwengxoxo ebiphakathi kwakhe nomongameli
weCricket SA, uMnu. uChris Nenzani, kwiintsuku ezidlulileyo. Kwiiveki
ezidlulileyo, uSmith wathi akasenawo umdla wokusebenzela iCricket SA ngenxa
yezinto ezithile ezingacacanga kakuhle ngethuba ingqonyela yeCricket SA, uMnu.
Thabang Moroe onqunyanyisiweyo, ebesaxhuzula imikhala. “Ndatsho esidlangalaleni
ukuba ndinawo umdla wokuncedisa iCSA. Nangoku kusenjalo. Zininzi izinto ezifuna
ingqwalasela kwezi veki zizayo. Injongo yam kukwenza izinto ezakuthi zenze
umahluko,” utshilo uSmith kwingxelo ekutshwe emva kokuchongwa kwakhe. Yona
ingqonyela ebambeleyo, uMnu. uJacques Faul, uthe iqumrhu lakhe limbona uSmith
njengenxalenye yesisombululo seengxaki zeCricket SA. “Siza kubona ukuba izinto
zihamba njani. Into esiyifunayo kukuba atyikitye isivumelwano sexesha elide.
Kufuneka uSmith eze namagama wabantu abaza kuvala izithuba kwiqela lesizwe
ukuze ndikwazi ukuwasa kwisigqeba esilawulayo,” utshilo uFaul.

UMzantsi
Afrika ubuye uhlazekile kwitumente yeHlabathi emva kokukhutshwa kumjikelo
wokuqala. Emva koko kukhululwe umqeqeshi kwayeka nabadlali abaliqela. Iingxaki
zolawulo oluhesheheshe nokuthintelwa kweentatheli ebezibhenzisa izinto
ezinganziwa ngendlela yiCricket SA phantsi kukaMoroe kuye kwavusa umnyele
ebantwini abaninzi. Kwiveki ephelileyo, isigqeba seCricket SA siye sanqumamisa
uMoroe saze safaka uJacques Faul endaweni yakhe.

 

 

RELATED ARTICLESMORE FROM AUTHOR