Ubuyile kwakhona ngokuhlwa ngoMvulo ukuya ngoLwesihlanu kwiSABC 2, umdlalo kamabonakude othi Muvhango, emva kokuba kwathi kwadizwa iindaba zokuba lo mdlalo ufikelele esiphelweni kwinyanga ephelileyo uJulayi.
Oku kulandela ingxelo ekhutshwe kutshanje yiSABC 2 ikunye neWord of Mouth Pictures, engabavelisi bomdlalo kamabonakude uMuvhango, emva komsitho wokutyhila isahluko esitsha ngalo mdlalo, nobubanjelwe eFourways, eGoli.
Emva kokuqhuba ngaphezulu kweminyaka engamashumi amabini anesixhenxe (27), utsala umdla ngendlela yokubalisa ibali, nabalingisi abakwizinga eliphezulu, uMuvhango uqale isiqalo esitsha, nalapo uqulethe nabadlali abatsha abaziwayo.
Nakuba lo mdlalo uhlaziyiwe ngendlela yokuwuvuselela, usaza kuqhuba nokuzibophelela kwawo okungagungqiyo ekuhlonipheni inkcubeko namasiko akwaVenda, kwanokuhlala unyanisekile kwindlela owathi wasungulwa ngawo.
Omnye wabadlali abaziwayo noyinxalenye yalo mdlalo nguLeleti Khumalo owazenzela igama kwimidlalo emininzi kamabonakude efana noSarafina!. UKhumalo uza kulingisa indawo kaDr Nontlantla Ximba, ukanti ubukho bakhe kulindele butsale umdla nangakumbi kubathandi balo mdlalo.
NgoMvulo, umhla wesihlanu kule nyanga ka-Agasti, lo mdlalo udlale isiqendu sawo sokuqala ngqa emva kokuba wawubhengezwe njengophelileyo kwinyanga ephelileyo.
I-SABC, ikunye nabavelisi balo mdlalo badize uvuyo abanalo hayi nje sisiqalo esitsha, koko kwanokubhiyozela ilifa lalo mdlalo.
UMuvhango ngumdlalo kamabonakude obhalwe ngumakhwekhwetha uDuma ka Ndlovu, ze waveliswa yiWord of Mouth, kwaye udlala rhoqo ngentsimbi yethoba kuSABC 2.
Kufike ixesha lokuba ndibuyele ekhaya, utsho uSiya Kolisi