Imvumi yoMzantsi Afrika, uTyla wenze imbali kwakhona njengemvumi yokuqala yaseAfrika ukuphumelela iimbasa ezintathu ngobusuku obunye kwiiMTV European Music Awards (EMAs). Le mvumi iqokelele iimbasa zeBest Afrobeats, Best African Act kunye neBest R&B.
Ezi mbasa bezingeCawe, ngomhla we10 kuNovemba 2024 eCo-op Live Arena eManchester, eNgilani.
Esamkela imbasa yakhe yeBest R&B, uTyla wothulele umngqwazi imvumi yaseMelika engasekhoyo uAaliyah, ebonakalisa uthando lwakhe kule mvumi. “Ndiyayazi ukuba kunzima ukuhlulahlula umculo wam, ndidibanisa iintlobo ezininzi ezahlukeneyo zibe nye, kodwa iR&B inefuthe elikhulu kumculo wam, ngakumbi uAaliyah,” utshilo.
Le mvumi ithe xa isamkela imbasa yeAfrobeats: “Ndiwongekile ngokuphumelela le mbasa. Enkosi kwiAfrobeats. IAfrobeats ivulelele umculo waseAfrika iminyango emininzi.”
UTyla ukwacula kwezi mbasa esonwabisa abantu ngengoma yakhe eyamenza waduma kwihlabathi jikelele ethi Water nengoma yakhe entsha kraca ethi Push 2 Start.
UTyla sele eqokelele iimbasa ezininzi, kuquka iimbasa ezinkulu zaphesheya ezifana neeGrammy, BET kunye neeMTV Video Awards.
UMzantsi Afrika uza kongamela iG20: Kuthetha ntoni oko?