Uwufulathele omagad’ ahlabayo uPapa Wemba

INDUMASI yemvumi yelizwe laseCongo ibitsholoza e-Abidjan e-Ivory Coast ngethuba iquleka phantsi.

UPapa Wemba, ubonakala kumfanekiso wevidiyo equleka ngexa ephakathi engomeni, waze kamva wasweleka. Kulo mfanekiso wevidiyo sibona abo bacula naye (backing singers) begxalathelana ukuyokumnceda. Amajelo eendaba azinze kwela lizwe adize ukuba, eli gqala liye lafa isiqaqa laze labhubha liminyaka ingamashumi amathandathu anesithandathu (66).

UPapa Wemba, ogama lokwenene inguJules Shungu Wembadio Pene Kikumba, ebengomnye weemvumi ezibalaseleyo kwilizwekazi lase-Afrika.

Ebetsholoza kumnyhadala, iFestival des Musiques Urbaines d’ Anoumabo (FEMUA) ngethuba equleka. Abaququzeleli be-FEMUA kwinkomfa noonondaba, baye bangqina ukuba ngokwenene uPapa Wemba uye wabhubha. Obethethela le mvumi uHenry Christmas Mbuta Vokia, uxelele isikhululo sela lizwe iRadio Okapi ukuba: “Malunga no 5:10, ngokwexesha laseAbidjan, uPapa

“Ucule ingoma yokuqala neyesibini. Ngethuba ekwingoma yesithathu, uye waquleka. “Bendilandela le khonsathi ngqo kumabonakude. Ndibone abadanisi bengqonga uPapa Wemba.

Bendicinga ukuba yindima ethile yekhonsathi. “Kodwa ndithe kamva ndabona abantu be-Ivorian Red Cross begxalathelana eqongeni. “Ngokukhawuleza, siye saluqhawula unxibelelwano lukamabonakude wase-Ivory. Ndizame ukutsalela imanejala kaPapa Wemba ephesheya, uCornelie.

“Uye wandixelela ukuba uPapa Wemba uye wawa ngethuba lekhonsathi. “Ndiyakhumbula kwimizuzu elishumi egqithileyo, ndixelelwe ukuba ukwicandelo labameko imandundu.

Ndiye ndafowuna kwimizuzu engama-30 emva koko, uCornelie undixelele ukuba uPapa Wemba usishiyile.”