Bathi bazakuyiphazamisa intetho yonyaka kamongameli uJacob Zuma abafundi nabasebenzi beYunivesithi yoMzantsi Afrika i-Unisa ukuba iimfuno zabo aziqwalaselwa lela ziko.
Ingxelo ithi olu qhankqalazo lunyanzelisa ukuba kuqeshwe ngokusisigxina oonogada, abacoci, abasebenzi bamaziko okutya kwanabo bacoca iigadi. Bakwanyanzelisa ukuba abafundi kumaziko onke ale yunivesithi mababhalise ngaphandle kwentlawulo.
Isicwangciso solu qhankqalazo sithi kuzakuphazanyiswa intetho kamongameli kanye ngomhla azakuba ethetha ngawo nesizwe kwinyanga ka- Febhruwari.
Abaqhankqalazi bazichithile iingxelo ezikhutshwe yila dyunivesithi kutshanje ezithi sele beqashiye abasebenzi abangonagada, abacoci kwanabo basebenza kwiindawo zokutya, kwaye le ngxelo inganyanisekanga ithi baqashwe kwizikhundla ezisisigxina.
Omele umbutho we-EFF kule ndibanisela uMpho Moralane uthi.” Sifumene le ngxelo ngo- Mvulo, abaphathi bale dyunivesithi abasixabisanga, okona sikufunayo kubo kukuba basimamele beve ukuba sifuna ukuthini benze le nto siyifunayo bayeke ukuxoka,” utshilo uMoralane.
Othethe egameni labameli babafundi nokwangusekela nobhala uNeo Hlabirwa uthi, unobungqina bokuba ingqonyela yale dyunivesithi uNjingalwazi Mandla Makhanya ekunye nabaphathi banesigqibo sokulibazisa ukuza nesisombululo kule ngxaki ade abuyele emsebenzi wakhe uMakhanya.
Umongameli weli wenza intetho yakhe yobume besizwe rhoqo ngenyanga kaFebhruwari echaza enabisa okuzakwenzeka kulo nyaka.
Le ntetho iphazanyiswe ngamandla ngumbutho we-EFF kunyaka ophelileyo nokwabangela ukuba umongameli Zuma anqumame okwexeshana kucengwa amalungu alo mbutho ekhokelwe ngumongameli wawo uJuluis Malema ukuba azole okanye ashiye ipalamante.
IPirates iza kudlalela ukuyibetha iSundowns, utsho uJose Riveiro