Abafundi bematriki ka2024 benze imbali emva kokuba bephumelele ngo87,3% kuzwelonke. Eli nani liphucuke nge4,4% xa lithelekiswa nonyaka u2023 – ngaphezu koko, iphondo ngalinye lifumene ngaphezulu kwe80%.
UMphathiswa weMfundo esiSiseko, uSiviwe Gwarube, ubhengeze ezi ziphumo ngokuhlwa kwangoMvulo eGoli.
Bangaphezu kwama600 000 abafundi abaphumelele iimviwo zika2024 zeNational Senior Certificate (NSC).
Abafundi ababhale iimviwo zeNSC baza bapasa ngeBachelor bayi47,8%. Iphondo leMpuma Koloni liphakathi kwamaphondo amathathu anawona bafundi baphumeleleyo ngeBachelor kweli loMzantsi Afrika.
“Ndinovuyo ukwazisa ukuba iKwaZulu-Natal inelona nani liphezulu labafundi abaphumeleleyo ngeBachelor abayi84 470, ilandelwa yiGauteng ngama66 979, neMpuma Koloni ngama45 662,” utshilo uGwarube.
NgokoMphathiswa, umyinge wama67% wabafundi abaphumeleleyo ngeBachelor ngo2024 baphuma kwizikolo ezikwiQuintile 1 ukuya ku3, ezidla ngokufunyanwa kwiindawo ezithwaxwa yintlupheko.
UMphathiswa wezeMfundo eMpuma Koloni, uFundile Gade, ebenethemba lokuba eli phondo liza kuphumelela ngo85%, nangona kunjalo, iphondo beliqhwalela nje ngo0,2% ekufezekiseni iinjongo zalo.
Abafundi abathathu abaphumelele emagqabini kwiziphumo zematriki eMpuma Koloni nabamele iphondo kwiqonga likazwelonke eGoli ngaba: USivikele Majebe osuka eXolilizwe Senior Secondary kwisithili saseAmathole, uKwazi Sitsheke waseTutor Ndamase Senior Secondary School kwisithili saseOR Tambo kunye noSinethemba Gangatha waseNcura Secondary School kwisithili saseAlfred Nzo.
Le yindlela iphondo ngalinye eliqhube ngayo kwiziphumo zematriki ka2024
1. eFreyistata – 91,0%
2. KwaZulu-Natal – 89,5%
3. eGauteng – 88,4%
4. eMntla Ntshona – 87,5%
5. eNtshona Koloni – 86,6%
6. eLimpopo – 85,01%
7. eMpumalanga – 84,99%
8. eMpuma Koloni – 84,98%
9. eMntla Koloni – 84,2%
Yona ibhodi yeemviwo ezizimeleyo (IEB) iphumelele iimviwo zeNSC zika2024 nge98,47%.
UMofokeng ufumene imoto ngenxa yokugqwesa kwakhe ebholeni