Abarhanelwa abane, uVuyani Mdlankomo (40), Mziwonke Hobongwana (27), Thandiswa Mantiba (37) kwakunye noThandokazi Mjijwa (31) bavele kwinkundla kamantyi eMonti izolo ngoLwesithathu umhla wamashumi amabini anesibhozo (28) kweyoMsintsi ngezityholo zokuba iintambo zombane kunye nokonakalisa iziseko ezingundoqo ezibalulekileyo.
Aba barhanelwa bane babanjwe liqela leeHawks elizinze eMonti eliphanda ngolwaphulo-mthetho iSerious Organised Crime Investigation ngokubambisana neScenery Park SAPS Vispol kwakunye neCombine Private Investigation Security Company.
Isithethi seeHawks uWarrant Officer Ndiphiwe Mhlakuvana uthi ngomhla wamashumi amabini anesithandathu (26) kweyoMsintsi ngo2023, kutyholwa ukuba eli qela lafumana ulwazi ngemoto lohlobo lweToyota Avanza eluhlaza (blue) ekutyholwa ukuba yayisuka e-Elliot isiya kwicala laseMonti.
“Nangona kunjalo, iinkcukacha zaveza ukuba esi sithuthi sichaziweyo sasithwele iintambo zombane ezobhedu ezibiweyo. Ezi ngxelo ziqhube zadiza ukuba eli qela lalandela olo lwazi nalapha labona isithuthi kufutshane neyadi yeenkunkuma (scrap yard) eMonti,” itshilo ingxelo kaMhlakuvana.
Ingxelo ithi ngaphakathi kwisithuthi bekukho aba barhanelwa abane ngethuba simiswa liqela. Isithuthi siye sagqogqwa, kwafunyanwa iingxowa ezintlanu ezigcwele iintambo zombane ezinobunzima obuziikhilogram ezingama-182.
Isithuthi saye sahluthwa. Lilonke ixabiso eliqikelelwayo lobhedu olubiweyo lingaphaya kweR25 000. Bobane abarhanelwa baye babanjwa kwangoko.
Ityala lihlehliselwe inyanga ezayo umhla wamashumi amabini anesine (24) kweyeDwarha ukuze bafumane ulwazi ngebheyile kwakunye bafake isicelo sebheyile esisesikweni.
Useziseleni uGogo Maweni!