Iqela iSilapha2 National Intervention Team eGqeberha licela uncedo kuluntu ekukhangeleni umrhanelwa, uManelisi “Maneli” Matoto, ofunwa ngeziganeko ezibini zokubulala ezenzeke ngomhla wama30 kweyeSilimela 2024.
Ingxelo yesithethi samapolisa uCaptain Sandra Janse Van Rensburg ithi malunga nentsimbi ye03:50 ngomhla wama30 kweyeSilimela 2024, ongasekhoyo uWayde Bowker (25) wayekwisitalato saseSweden, eTimothy Valley, ngethuba ekhawulelwa ngabarhanelwa ababini..
“Umrhanelwa ebexhobe ngompu efuna imali kunye neefowuni ngenkani kuWayde Bowker. Ngexesha lokuphanga, uWayde waxabana nabarhanelwa, kwathululwa iimbumbulu, kwaye uWayde wabhubhela kwindawo yexhwayelo. .
“Emva koko, abarhanelwa baqweqwedisa iOpel Astra emhlophe eyayipakwe esitalatweni, kwaye abarhanelwa abathathu abangamadoda kunye nowasetyhini omnye bemka nemoto. KwiOpel Astra, ixhoba belilele lingazi nto ngokuphangwa nokuqweqwediswa kwemoto ebiqhubeka,” utshilo uJanse Van Rensburg.
Ingxelo ithi emva kwaloo ntsasa, kwisitalato iSiyavuka, eBooysens Park, kwafunyanwa iOpel Astra itshisiwe. Ecaleni kwemoto, bafumene uHeinrich Williams (40) enenxeba lokudutyulwa entloko. Wabalekiselwa esibhedlele, nalapho wabhubha kamva ngenxa yokwenzakala kwakhe.
Isikhululo samapolisa eBethelsdorp sibhalise amatyala amabini okubulala, ngethuba kuqhutywa uphando, bakwazile ukufumanisa ukuba uManelisi “Maneli” Matoto uyayanyaniswa nezi ziganeko zokubulala kwaze kwakhutshwa nencwadi egunyazisa ukuba abanjwe. Kukwatyholwa ngelithi umrhanelwa uyayanyaniswa nezinye iziganeko zokubulala kwisithili saseNelson Mandela Bay.
Amapolisa abongoza nabani na onokuba nolwazi malunga nokuba uphi umrhanelwa ukuba atsalele umcuphi uDetective Warrant Officer Zacharia Phethla ku067 596 2425 okanye uDetective Sergeant Sox Sokanyile ku082 442 2270 okanye iCrime Stop ku08600 10111 okanye atyelele isikhululo samapolisa esikufutshane.
Abantu banokusebenzisa iMySAPS App ukubhala ulwazi ngaphandle kokuchaza amagama abo. Lonke ulwazi luyimfihlo, kwaye abafowunayo banokuhlala bengaziwa.
Kubanjwe abarhanelwa abangama84 kwisithili saseSarah Baartman