Iqela lamapolisa likazwelonke elijongene neempahla zomgunyathi likhokele elinye iphulo ngentsebenziswano namanye amaqela kwisitalato iRahima Moosa, kumbindi weRhawuti ngoLwesine, umhla we13 kweyeSilimela ka2024 ngeenzame zokuphelisa urhwebo olungekho mthethweni lweempahla zomgunyathi.
Eli phulo likhokelele ekuthinjweni kwezinto zomgunyathi ezingaphaya kwe7000 ezixabisa ngaphezulu kwezigidi ezithandathu zeerandi (R6.6 million), ngokwengxelo yesithethi samapolisa uLieutenant Colonel Amanda van Wyk.
Ingxelo yamapolisa iqhuba ithi ezi zinto zithinjiweyo zilinganisa iinkampani ezaziwayo eziquka izihlangu, iimpahla, iibhegi, iikepisi, iziqholo, izinto zokuthambisa kunye noobhaka.
“Amapolisa aphinde athimba oomatshini bokuthunga, umatshini osebenzisa imisonto emininzi neendlela ezahlukeneyo zokuthunga, umatshini wokukrola, umatshini wokushicilela oshushu kunye neeleyibhile ezininzi zeenkampani ezaziwayo. Eli lelona shishini likhulu lokuvelisa izinto zomgunyathi elithe lagqogqwa kulo nyaka,” utshilo uvan Wyk.
Amaqela asebenze namapolisa kweli phulo aquka amagosa aphuma kwiiNkonzo zeRhafu zoMzantsi Afrika (SARS), iGauteng Traffic, iiNkonzo zoLawulo oluNgxamisekileyo zaseGoli (EMS), abeBrand Protectors, iCrime Prevention Wardens nokhuseleko lwabucala.
Kwisithuba esingaphantsi kweveki edlulileyo, eli qela lathimba iimpahla zomgunyathi ezixabisa ngaphezulu kwezigidi ezihlanu zeerandi (R5.8 million) ngethuba beliqhuba iphulo elifanayo, nelalikumbindi weRhawuti.
Ixhwele laseKZN noonyana balo ababulala indoda baza kufaka isicelo sebheyile