Baseseluvalwelweni lwamapolisa oonqevu abathathu abagqugqisa kumantla eBhayi.
Yiminyaka eliqela ummandla waseGelvandale, Shauderville, Helenvale naseBethelsdorp ugquba oonqevu abavele badubulane ilanga lihlabe umhlaba.
Maxa wambi lo mlo uye uchaphazele nezikolo ezikulo mmandla. Oonqevu abathathu uWendell Pietersen (29), Keith Bowkers(31) kwakunye noBrendan Lucas (32) bavele kwinkundla yaseBhayi kule veki bejongene nezityholo zokuzama ukubulala nanjengoko kwinyanga ephelileyo kwaye kwadutyulwa abantu ababini bezihlelele phambi kwendlu yabo eShauderville.
Kutshanje kummandla waseHelenvale kudutyulwe imoto yamapolisa ngoonqevu.
Amapolisa amabini, naphantsi kwephulo lokutshabalalisa umlo woonqevu kumantla weBhayi, abehamba kulo mmandla ngethuba egagana neembumbulu.
Ngethamsanqa akukhange konzakale mntu ngethuba lesi sehlo. Owenze obu bubi uye wabaleka. UMkomishinala wamapolisa, uLieutenant General Celiwe Binta uthe: “Inkonzo yesipolisa asokuze inyamezele ukuhlaselwa kwamalungu ayo, owenza oko uzakujongana nengalo yomthetho.”
Umphathiswa wamapolisa kuzwelonke uNathi Nhleko sele ewutyelele amatyeli ummandla wakumantla eBhayi ebamba iindibano nabahlali ngeenjongo zokufumana ezona zizathu zibangela lo mlo.
abongile.ginya@inl.co.za
UNdlozi ubhengezwe njengomsasazi omtsha wePower FM