Basaqhuba nogwayimbo eMdantsane

BAFUNGE bemunca iintupha abahlali baseMdantsane, kwaWadi 17 ebebebambe uqhankqalazo ngentsasa yayizolo.

Aba bahlali bafunge ngelithi basezakuthi gqolo bephazamisa ulawulo kumasipala weBuffalo City. Bakuthethe oku emva kokuvala uhola wendlela uN2 betshisa amavili ngelikhalazela into abayichaze njengekratshi kumbutho weANC okhokele umasipala weBCM.

Abahlali bathathe isigqibo kwintlanganiso ebebeyibambe ngenjikalanga yangeCawe sokuba bazakuthatha amanyathelo emva ngokungasatyelwa kwezikhalazo zabo.

Inkokeli yabahlali, uXhanti Bholo uthe, “Besibambe uqhankqalazo olisingise kwii-ofisi zeANC kwingingqi iWB Rhubusana, endaweni yokwamkela izikhalazo zethu bakhetha ukusibaleka. Into esiyifunayo kukususa kukaPhumla Yenani njengoceba kwaWadi 17, wohlulakele ekumanyeni amalungu eANC kula Wadi, kwiinkqubo zikamasipala ukhetha abantu bakhe, akukho zinkonzo.”

Kwiiveki ezimbini ezidlulileyo, amalungu eANC ebebambe umngcelele woqhankqalazo ebekwakhala ngelithi inkqubo elandelwe yiANC kwintlanganiso yesebe aphinde onyula kuyo uYenani yayineziphene ongazange uzise so umbutho. Amapolisa ale ngingqi, kuquka nakamasipala afike abamba uthethwano nabahlali nelikhokelele kwintlanganiso phakathi kwabo kwakunye nosodolophu weBCM uAlfred Mtsi, kwakunye noMkhawuleli Maleki ongusekela nobhala kweANC eWB Rhubusana.

UBholo uthe, “Sibaxelele iimfuno zethu, akukho nto sizakuyimamela bengasusanga uPhumla njengoceba, sisezakuphinda sithethe nabo.”

Iinzame zokufumana uMaleki kwakunye noMtsi khange zibe nampumelelo.