NANGONA kusalindwe inkundla yoMgaqo-Siseko ikhuphe isigwebo ngemeko yabavoti abangenazidilesi kunyulo loorhulumente boomasipala, ikomishini ejongene nonyulo i-IEC ithi ikulungele ukubamba unyulo.
Oku kuthethwe ngusihlalo wale komishini kweli phondo uMfundisi Bongani Finca.
UFinca uthe, amalungiselelo onyulo ngalinye aqala emva kweziphumo zonyulo oludlulileyo.
OkaFinca ebethetha kwindibano yombutho woomasipala iSALGA ebiseBhayi ukususela ngoLwesithathu, nebizinyaswe ngumphathiswa wobambiswano kurhulumento nemicimbi yemveli uDavid va Rooyen, amasekela akhe uAndries Nel, no-Obed Bapela namanye amagosa aseburhulumenteni.
Kule ndibano iSALGA ikhuthaze uluntu lweli ukuba lusebenzisane noomasipala kukhuselwe izakhiwo zaseburhulumenteni ezonakaliswa luluntu xa bekhalazela iinkonzo. Ikwakhuthaze uluntu ukuba lihlawule iinkonzo zoomasipala.
Usihlalo weSALGA uThabo Manyoni ukhuthaze intsebenziswano koomasipala bezithili kwakunye nabengingqi.
UManyoni uthe, “Sifuna ukubona intsebenziswano kwaba masipala, kubanjiswane ngezicwangciso nangeminye imiba.”
Usekela mphathiswa wobambiswano kurhulumento nemicimbi yemveli uBapela uthe iCOGTA inoxanduva lokufundisa ooceba xa bengena njengamalungu ebhunga likamasipala, kodwa uxanduva likoomasipala ukuqinisekisa ukuba ooceba bayayazi yonke imiba yoomasipala abakubo. Uhlabe ikhwelo kwabo babulala izakhiwo xa benokunganeliseki esithi,
“Uluntu xa liqhankqalaza malungophuli izinto elizakuphinda lizidinge.”
Ukanti uNel olelinye lamasekela kweli sebe uthe iCOGTA izakuthatha amanyathelo aqatha kumagosa akwamasipala anobuqhophololo.
Uqhube wathi, “Nangona kusekho inkcithomali engafanelekanga kukho ukuphucuka kweziphumo kule minyaka mihlanu idlulileyo.”
Ukwathe amagosa ezomthetho ebambisene nebutho leSIU aqhuba uphando ngakoomasipala abanganiki nkcaza ipheleleyo ngenkcithomali engafanelekanga.
Wenze isilumkiso kumaqela aphikisayo esithi, “Masikhuseleni ukuzimela kweIEC, njengosompempe, singayidyobhi ngokuqhubeka kwezopolitiko.”
Kubhubhe abantu kwingozi eyenzeke phakathi kweGcuwa neDutywa!