Ifumene umfutho i-Hyundai H-1 ka2016

I-Hyundai H-1 ifumene udlamkiso kuluhlu lwemizekelo yonke. Ngaphandle zonke zifumana i-grill ne-bumper entsha, ngaphakathi i-centre console ne-instrument cluster zintsha, namavili e-16-inch angumxube weentsimbi (alloys). I-H-1 Panel Van yona isezokufumaneka namavili aluhlobo lwentsimbi enye esindayo (steel).

Owona mzekelo ufumana okutsha okwenza ngcono ukuphila yi-2.5 Turbo-Diesel 9-Seater Bus. Kuyo kufakelwe i-cruise control nonomathotholo onxulumanisa unomyayi ne-Bluetooth, zombini zilawuleka ngamaqhosha akwiimpondo zokuqhuba (mpondo ezo ezombathiswe ngofele njengenduku yegiya). Kukho nezipili eziqosheleka ngombane, i-glovebox ebandisekayo, i-airbag emacaleni, i-airconditioner ezilawulayo, isitshixo esiqhoshelekayo, ne-Electronic Stability Programme.

I-Hyundai H-1 ifumaneka ngeentlobo ezine. Kukho i-Panel Van ehlala abantu abathathu ngaphambili, lena ithandwa ngamashishini athutha iipasela, njalo-njalo.

Kubekho i-6-seater Multi-Cab ethutha abasebenzi nezixhobo zabo ngemva. Ze kubekho ibhasi eyi-9-seater ekwizinga eliphezulu nezo zitulo zayo zofele oluntofo-ntofo. L-

ena isikakhulu isetyenziswa ukuthutha abantu, mhlawumbi ukusuka ehotele ukuya kwisikhululo seenqwelo-moya, okanye iseyenziswe kwezotyelelo (tourism) ukuhambisa abantu. Zontathu ezi ntlobo ze-Hyundai H-1 ziza zitsala ngenjini yedizili ye-2.5 litre ena-125kW/441Nm, amandla ewasa emavilini angasemva. Eyesine intlobo ye-H-1 yi-9-seater etsala ngenjini yepetroli.

Zonke ii-H-1 zihleli nge-suspension ye-McPherson Struts ngaphambili. Ngemva ii-9-seater zine-5-link suspension edibeneyo (rigid axle 5-link suspension) ene-shock absorbers ezine oyili ukuze uhambo lubemtofo.

Ii-3-seater nee-6-seater zinohlobo lwe-leaf spring suspension ukuze zikwazi ukuthwala imithwalo esindayo kangange-1100kg.

Isikakhulu zonke ii-H-1 zivakala ngathi yimoto nje enkulu. Imtofo endleleni, iimpondo zokuqhuba zohlobo lwe-rack and pinion zithambile.

Uye ukhumbule ukuba i-H-1 inkulu ngomzimba xa kufuneke upake, kodwa uyancedeka ngoba izalathisi zokupaka zikhona ngemva ukuze ungayingqubisi. Ngaphakathi isithuba sininzi sidlala abantwana.

I-Hyundai H-1 ikhuphisana ne-VW Kombi/Transporter, Mercedes-Benz Vito, Toyota Quantum. Singathi ukhetho kwezi lungalawulwa kukuba inzulu kangakanani impokotho, kuba zonke zithembekile. Ukuba ufuna ukuphinda uyithengise emva kweminyaka embalwa, i-Quantum ne-Vito zingabhetele.

Amaxabiso:

Hyundai H-1 2.5 Turbo-Diesel 3-Seater Panel Van – R441 900

Hyundai H-1 2.5 Turbo-Diesel 6-Seater Multi-Cab – R492 900

Hyundai H-1 2.4 Petrol 9-Seater Bus (Manual) – R482 900

Hyundai H-1 2.5 Turbo-Diesel 9-Seater Bus (Auto) – R579 900

Warranty – Iminyaka eyi-5 / 150 000km

Service Plan – Iminyaka eyi-5 / 90 000km