Kule veki izayo isixeko saseMonti siza kusindleka imisitho emikhulu emibini ekulindeleke ukuba ixovule imiba yezoqoqosho oluchaphazela iMonti, iMpuma Koloni kwanelizwe liphela.
Iintsuku ezimbini ukusuka ngoLwesithathu, womhla wamashumi amabini anesixhenxe, isixeko siza kube sisingethe ingqungquthela yokuxovula uqoqosho lweelwandle eHemingways.
Le ngqungquthela, ezakube isingathwe nguMphathiswa weMisebenzi yoLuntu uThulas Nxesi, iza kuxovula umbandela wokutsala abatyalizimali kuqoqosho lwemimandla egudle unxweme.
Xa kuphela nje lo msitho ozakube ubanjelwe eHemingways, isixeko siza kube sele sikwiiyure ezivisayo siqale ingqungquthela yamazwe aphantsi kweBRICS (Brazil, Russia, India, China and South Africa) eza kubanjelwa eICC eMonti de kube ngomhla wokuqala kweyeKhala.
Imiba eliqela kule ngqungquthela yeBRICS, nequka urhwebo noshishino, kulindeleke ukuba inyathelwe ngamandla.
USodolophu waseBuffalo City uXola Pakati uthi esi sixeko sikulungele ukusingatha imisitho emikhulu.
“Sizibambile iindibano eziliqela, silungiselela ukuba ibe yimpumelelo le ngqungquthela yeBRICS kwaye iinjongo zethu kukubonakalisa ukuba isixeko sethu sinawo umthamo wokusingatha imisitho emikhulu,” utshilo uPakati.
Liyoyikisa izinga lokunyamalala kwamadoda eGqeberha!