UKUBHUBHA kukaSakhekile Ndudula obesebenza njengegosa eliphezulu kwisebe lophuhliso loluntu eMpuma Koloni kushiye ingxinano yemibuzo endaweni yeempendulo.
UNdudula (52) ebekumzi wakhe eCambridge West eMonti malunga nentsimbi yesixhenxe kusasa ngoLwesithathu elungiselela ukuya emsebenzini ngethuba kugaleleka amadoda angaziwayo avulela ngeembumbulu. Isithethi samapolisa uKapteni Mluleki Mbi uthi lo kaNdudula ebehleli nenkosikazi yakhe ngethuba efumana elishwangusha. “Udutyulwe isikakhulu kumzimba ongentla izihlandlo ezisibhozo. Abarhanelwa abakhange bathathe kwanto, nemoto bayishiye apho babaleka,” utshilo uMbi.
UNdudula uye wabalekiselwa kwisibhedlele iSt Dominics eMonti apho abhubhe xa kanye esithi cakatha kumasango esi sibhedlele.
Ebesebenza njengengqonyela yabasebenzi (Chief of Staff) kwi-ofisi yomphathiswa wesebe lophuhliso loluntu uNancy Sihlwayi. Isithethi sikarhulumente waseMpuma Koloni uSizwe Kupelo uthi lo kaNdudula uyakusoloko ekhunjulwa ngegalelo alenze kurhulumente weli phondo. “Singurhulumente wephondo sidlulisa amazwi ovelwano kusapho nakoogxa bakhe,” kutsho uKupelo.
Imiyalezo yokuthuthuzela uNdudula ibiphokoka kumaqonga onxibelelwano afana noFacebook. UMbi uthi amapolisa aphanda ityala lokubulala. “Sicela wonke umntu onolwazi ukuba akrwece amapolisa akufuphi naye,” utshilo uMbi.
UMalusi waseDutywa ubuye encumile kwiTCS London Marathon!