INTOMBI yelali yaseTildini cebukuhle kwidolophu yaseNgqushwa, uAnazo Nongubo, nguye ophumelele kwicandelo losasazo kukhuphiswano lweTru Talent leTruFM.
Le nzwakazi, 28, ibethe bonke abo bikhuphisana nabo kususela oko luthe lwaqala olu khuphiswano. UNongubo ubhengezwe kumsitho weTru Talent Awards obubanjelwe kwiHolo leSixeko eMonti ngokuhlwa ngoMgqibelo weveki ephelileyo.
UNongubo, owafundela izifundo zobuNtatheli [ Diploma in Journalism ] eWalter Sisulu University usebenze njengomsasazi weLink FM eMonti phambi kokuba aye kwisikhululo sakokwabo iNgqushwa FM.
Eli gqiyazana limke kolu khuphiswano lifumbethe iR10 000 eyimali, idata engu5GB yakwaVodacom kwakunye nesivumelwano sengqesho njengomsasazi weTruFM eBhisho.
Ukanti abanye abaphumelele kolu khuphiswano liqela lomdaniso iDe Electronics, ze uMpumi Dlamini yanguye ophumelele kwicala lomculo kukhuphiswano lweTru Talent.
Emnye kubo umke neshumi lamawaka eerandi kwakunye nedata yakwaVodacom engu-5GB eza kuqhuba iinyanga ezintathu.
Esi sikhululo sosasazo kulindeleke siqhube nomlenze walo nyaka wolu khuphiswano kungekudala.
Libanjelwe isatifikethi sikaGrade 12 somgunyathi iGosa lezeMpilo