Kubanjwe umrhanelwa wesibini ogama linguMpumelelo Nyosi (41), ebanjwa ngomhla wesine (4) kwiveki ephelileyo ngabecandelo lophando baseMadeira eMthatha, notyholwa ngokusebenzisana nosele kukudala endyondya eziseleni, uNtsika Tyali (38), nobesebenza njengonesi kwikliniki yelokishi yaseMgangelizwe eMthatha.
Ngokwengxelo yesithethi seeHawks eMpuma Koloni uNdimphiwe Mhlakuvana, esi sibini, uTyali noNyosi, ngomhla wesithandathu (6) kuJuni wonyaka ophelileyo, baxhwila abantu ababini kwikhaya labo eliseNgcobo, babanyanzela emotweni bebakhombe ngemipu, emva koko bamisa kwindawo engaziwayo bafuna imali ngenkani namakhadi eebhanki neepini zebhanki.
UMhlakuvana uthi abarhanelwa bakhupha izikhaxa zemali nabaye bathenga iimpahla zikanokutsho kwiivenkile ezidurayo. Amaxhoba aphulukana nemali engapha kwesigidi seerandi (R1.5 million).
Uphando luqhuba luthi esi sibini sirhanelekayo saye sabelana ngemali eshiyekileyo ngokulinganayo.
Ingxelo iqhuba ithi, iqela lecandelo labaphandi libambe uNyosi kwisitalato iSprigg edolophini eMthatha kwiveki ephelileyo ngoMgqibelo, wavalelwa kwangoko.
UNyosi uvelile ngoMvulo kule veki umhla wesithandathu (6) kwiNkundla yamaTyala eNgcobo nojongene nezityholo zokuxhwila. Ityala limiselwe uLwesine wale veki apho kulindeleke ukuba afake isicelo sebheyile.
UNyosi udityaniswe natyholwa naye uTyali.
UTyali wabanjwa nge17 kaJulayi kunyaka ophelileyo, oko wayengaphakathi eziseleni.
ElezoThutho lithi liyaxhalabisa inani elonyukileyo lokubhubha kwabantu ePhondweni!