Itshantliziyo lamalungelo oluntu kwanonyawontle uMfundisi Jesse Jackson waseMelika ugalelekile eMzantsi Afrika ukuza kunika imbeko kwigqala lomzabalazo uWinnie Madikizela-Mandela.
UJackson, owayebhale kuTwitter elilisana noMzantsi Afrika kwiiyure ezimbalwa emva kokuvakala kweendaba zokubhubha kukaMadikizela-Mandela, uthi eli qhawekazi beliyintsika negalelo kongasekhoyo uNelson Mandela.
Lo nyawontle uthi ebengumhlobo kuMadikizela-Mandela, esithi uMadikizela-Mandela udlale indima engenambaliso kumzabalazo wokukhulula uluntu loMzantsi Afrika kumatyathanga engcinezelo.
“Akazange ayeke ukulwela abantu, de kwabe kusekubhubheni kwakhe. UWinnie wawugcina uphila [umbutho iANC] ngethuba lengcinezelo eMzantsi Afrika. Yiyo lo nto ndize apha. Ndikubona njengentsikelelo ukwazana nalo mama,” utshilo uJackson.
Ukanti namhlanje (ngoLwesihlanu) uluntu luza kube luyinxalenye nomlindo kaMadikizela-Mandela kwiholo yoluntu eOrlando eSoweto, ze ngoMgqibelo (ngomso) indimbane ingungelane eOrlando Stadium kumngcwabo weli gorhakazi.
Kuvulwe isikolo esixabisa iR106-million KwaMaxhama